جیتنے والوں کو پانچ کیٹیگریز میں 4 ملین ریاال کے انعامات کےعلاوہ تمام شرکا کو ایک ملین ریال کے انعامات دیے گئے۔
سبق کے مطابق سعودی وزیر اسلامی امور نے مقابلے کے نتائج اور فاتحین کے ناموں کی منظوری دی۔
اب تک کے سب سے بڑے مقابلے میں 128 ممالک سے تعلق رکھنے والے 179 افراد شریک ہوئے۔
پہلی کیٹیگری میں پانچ لاکھ ریال کا پہلا انعام جمہوریہ چاڈ کے محمد آدم محمد نے حاصل کیا۔ سعودی عرب کے انس بن ماجد الحازمی نے ساڑھے چار لاکھ ریال کے دوسرے اور نائیجریا کے سنوسی بخاری ادریس چار لاکھ ریال کے تیسرے انعام کے حقدار ٹہرے۔
دوسری کیٹیگری میں سعودی عرب کے منصور بن متعب الحربی نے تین لاکھ ریال کا پہلا، الجزائر کے عبدالودود بن سدیرہ نے دو لاکھ 75 ہزار ریال کا دوسرا جبکہ ایتھوپیا کے ابراہیم خیرالدین محمد نے ڈھائی لاکھ ریال کا تیسرا انعام حاصل کیا۔
مقابلے کے تمام شرکا کو ایک ملین ریال کے انعامات دیے گئے۔(فوٹو: ایس پی اے)
تیسری کیٹیگری میں دو لاکھ ریال کا پہلا انعام یمن کے محمد دماج الشویع، ایک لاکھ 90 ہزار ریال کا دوسرا انعام چاڈ کے محمد کوسی، تیسرا انعام ایک لاکھ 80 ہزار ریال سینگال کے بدر جانج، پانچواں انعام ایک لاکھ 70 ہزار ریال امریکہ کے محمد امین حسن، پانچواں انعام ایک لاکھ 60 ہزار ریال فلسطین کے کمال منسی کو ملا ہے۔
چوتھی کیٹیگری میں ڈیڑھ لاکھ ریال سے ایک لاکھ 10 ہزار ریال جبکہ پانچویں کیٹیگری میں 65 ہزار ریاال سے 45 ہزار ریال کے انعامات دیے گئے۔
نائب گورنر مکہ شہزادہ سعود بن مشعل نے اختتامی تقریب میں شرکت کی( فوٹو: ایس پی اے)
یاد رہے کہ فائنل راؤنڈ چھ روز جاری رہنے کے بعد کامیابی سے اختتام پذیر ہوا تھا جس کے بعد اختتامی تقریب کا انعقاد کیا گیا۔
قبل ازیں مقابلے کے کئی شرکا نے کہا تھا کہ فائنل راونڈ تک پہنچنا ان کے لیے فخر اور بڑے اعزاز کا باعث ہے۔
انہوں نے بین الاقوامی ججز اور جدید الیکٹرانک ججنگ سسٹم کو سراہتے ہوئے وزارت اسلامی امور کا شکریہ ادا کیا۔
