سعودی عرب اور رابطہ عالم اسلامی کی سوڈان میں امدادی قافلے پر حملے کی مذمت

سعودی عرب نے سوڈان میں شمالی دارفور کے علاقے میں ورلڈ فوڈ پروگرام کے امدادی قافلے پر ہونے والے حملے کی مذمت کی ہے۔

ایس پی اے کے مطابق 16 گاڑیوں پر مشتمل امدادی قافلے میں شامل تین ٹرکوں میں آ گ لگ گئی، قافلے کو اس وقت نشانہ بنایا گیا جب وہ قحط زدہ علاقے میں امداد پہنچانے کی کوشش کررہا تھا۔

سعودی وزارت خارجہ نے بیان میں واضح طور پر کسی بھی ایسی چیز کو مسترد کیا جس سے شہریوں، ریلیف اور انسانی ہمدردی کے کارکنوں کی سلامتی اور تحفظ کو خطرہ لاحق ہو۔

سعودی عرب نے سوڈان میں تمام فریقوں پر زور دیا کہ وہ 11 مئی 2023 کو دستخط  کیے گئے جدہ اعلامیہ پر عمل کریں جس میں شہریوں کے تحفظ، ریلیف اور انسانی امداد کی راہداروں کے تحفظ کو یقینی بنانے کا عزم شامل ہے۔

علاوہ ازیں رابطہ عالم اسلامی نے بھی حملے کی سخت مذمت کی، اسے مذہبی اقدار اور بین الاقوامی قوانین کی سنگین خلاف ورزی قرار دیا جبکہ سوڈانی عوام جنگ کی تباہی اور اس کے اثرات سے متاثر ہیں۔

بیان میں فریقین پر زور دیا گیا کہ وہ جدہ اعلامیے کے نکات کی  پاسداری کریں جس میں شہریوں اور امدادی سامان کی راہداروں کے تحفظ کو یقینی بنانا شامل ہے۔ سوڈان کے تنازع کے سیاسی حل تک پہنچنے کے لیے موثر اور سنجیدہ مذاکرات کیے جائیں۔
یاد رہے کہ سعودی عرب اور امریکہ کی ثالثی میں سوڈان میں دو اہم فریقوں سوڈانی مسلح فورسز اور ریپڈ سپورٹ فورسز نے جدہ اعلامیے پر دستخط کیے تھے۔