او آئی سی اجلاس میں شرکت کے لیے وزیر خارجہ اسحاق ڈار جدہ پہنچ گئے
فلسطین کے ایشو پر ہونے والے اجلاس میں رکن ممالک کے وزرائے خارجہ شریک ہو رہے ہیں (فائل فوٹو: عرب نیوز)
پاکستان کے نائب وزیراعظم اور وزیر خارجہ اسحاق ڈار اسلامی تعاون تنظیم (او آئی سی) کے اجلاس میں شرکت کے لیے جدہ پہنچ گئے ہیں۔
پیر کو دفتر خارجہ کی جانب سے جاری بیان کے مطابق اسحاق ڈار او آئی سی کے غیرمعمولی سیشن میں شرکت کریں گے جو آج جدہ میں او آئی سی سیکریٹریٹ میں منعقد ہو رہا ہے اور اس میں کونسل کے رکن ممالک کے وزرائے خارجہ شرکت کر رہے ہیں۔
بیان کے مطابق کنگ عبدالعزیز انٹرننشنل ایئرپورٹ پر نائب وزیراعظم کا استقبال او آئی سی میں پاکستان کے مستقل نمائندے فواد شیر، سعودی عرب میں پاکستان کے سفیر احمد فاروق اور پاکستان قونصل جنرل کے خالد ماجد نے کیا۔
اسلامی تعاون تنظیم (او آئی سی) کے اس اجلاس میں رکن ممالک کے وزراء خارجہ اور سینیئر حکام شرکت کریں گے تاکہ فلسطین میں جاری اسرائیلی فوجی جارحیت، غزہ پر مکمل فوجی کنٹرول کے مجوزہ منصوبے اور فلسطینیوں کے حقوق کی مسلسل سنگین خلاف ورزیوں کے تناظر میں مربوط ردعمل پر غور کیا جا سکے۔
اتوار کو دفتر خارجہ کی جانب سے بیان میں بتایا گیا تھا کہ ’پاکستان جو فلسطینی کاز کا ایک سرگرم حامی ہے اور وہ بین الاقوامی فورمز پر اس مسئلے کو مسلسل اجاگر کرتا رہا ہے۔
بیان کے مطابق ’او آئی سی وزرا خارجہ کے غیرمعمولی اجلاس میں نائب وزیراعظم و وزیرخارجہ فلسطین کے لیے پاکستان کی غیرمتزلزل حمایت کا اعادہ کریں گے اور پاکستان کے اصولی موقف کو دوہرائیں گے۔‘
بیان میں یہ بھی بتایا گیا تھا کہ ’نائب وزیراعظم و وزیرخارجہ اسرائیل سے تمام مقبوضہ فلسطینی علاقوں سے مکمل انخلا کا مطالبہ کریں گے، غزہ پر مکمل فوجی کنٹرول اور فلسطینیوں کی مزید بے دخلی کے اسرائیلی منصوبے کو مسترد کریں گے، انسانی امداد کی بلاروک ٹوک فراہمی کی فوری ضرورت پر زور دیں گے اور فلسطینی عوام کے جائز حقوق کی بحالی کا مطالبہ کریں گے جن میں ایک ایسی آزاد اور خودمختار فلسطینی ریاست کے قیام کا مطالبہ شامل ہے جو جون 1967 سے قبل کی سرحدوں پر مبنی ہو اور جس کا دارالحکومت القدس الشریف ہو۔‘
اس اہم اجلاس کے موقع پر نائب وزیراعظم و وزیرخارجہ اسحاق ڈار کی اہم رکن ممالک کے ہم منصبوں سے دو طرفہ ملاقاتیں متوقع ہیں۔
