کنگ فیصل ایوارڈ 2027: پانچ شعبوں میں نامزدگیاں وصول کرنے کا اعلان

کنگ فیصل ایوارڈ کے جنرل سیکریٹریٹ نے پیر کو پانچ شعبوں میں 2027 کے ایوارڈ کے لیے نامزدگیاں وصول کرنے کا اعلان کیا ہے، ان میں اسلام کی خدمت، اسلامی علوم، عربی زبان اور ادب، طب اور سائنس شامل ہیں۔

ایس پی اے کے مطاق کنگ فیصل ایوارڈ کے سیکریٹری جنرل ڈاکٹرعبدالعزیز السبیل نے ایوارڈ کی 48 سالہ تاریخ کا ذکر کیا جس میں ان افراد اور اداروں کو تسلیم کیا گیا جنہوں نے انسانیت کے لیے اہم خدمات انجام دیں۔

انہوں نے بتایا کہ’2026 کے ایوارڈ کے لیے ہر شعبے میں ایک علمی موضوع کا انتخاب کیا گیا ہے۔‘

اس مرتبہ اسلامی علوم میں (فقہی مطالعات)، عربی زبان اور ادب میں (عربی زبان کے فروغ  میں ادارہ جاتی کوششیں)، سائنس میں (کیمسٹری) جبکہ طب میں (کلینیکل میڈیسن میں مصنوعی ذہانت) کا تعین کیا گیا ہے۔

جبکہ اسلام کی خدمت ایک اعزازی ایوارڈ ہے جو ان لوگوں کو دیا جاتا ہے جن کی خیر سگالی کی کوششوں نے اسلام، مسلمانوں اور انسانیت کے لیے غیرمعمولی خدمت کی۔

نامزدگیاں یکم ستمبر 2025 سے 31 مارچ 2026 تک وصول کی جائیں گی۔ تعلیمی اور سائننسی اداروں کے ساتھ تحقیقی مراکز کے ذریعے بھی جمع کرائی جا سکتی ہیں۔ نامزدگیاں ای میل یا پورٹل کے ذریعے بھیجی جا سکتی ہیں۔

کنگ فیصل ایوارڈ اور اس کے گورننگ قوانین کے حوالے سے مزید تفصیلات ویب سائٹ سے مل سکتی ہیں۔

یاد رہے کنگ فیصل ایوارڈ  1979 میں پہلی مرتبہ تین شعبوں اسلام کی خدمت، اسلامی علوم اور عربی زبان و ادب میں دیا گیا تھا۔

1980 میں دو مزید شعبے طب اور سائنس  متعارف کرائے گئے، طب کا پہلا ایوارڈ 1982 میں اور سائنس میں دو سال بعد دیا گیا تھا۔

 ایوارڈ یافتگان کو دو لاکھ ڈالر، 200 گرام 24 قیراط کا گولڈ میڈل اور سرٹیفکیٹ دیا جاتا ہے۔