ٹی20 ورلڈ کپ کا آج سے آغاز، قومی ٹیم نیدرلینڈز کے خلاف میدان میں اُترے گی
آئی سی سی ٹی 20 ورلڈ کپ کا آغاز آج سنیچر سے ہو رہا ہے، کولمبو کے سنہالیز سپورٹس کلب گرائونڈ میں پاکستانی ٹیم پہلا میچ نیدرلینڈز کے خلاف کھیلے گی۔
میچ سنہالی سپورٹس کلب میں پاکستانی وقت کے مطابق صبح ساڑھے دس بجے شروع ہوگا۔
سلمان علی آغا پہلی بار آئی سی سی ٹی ٹوئنٹی ورلڈ کپ میں پاکستان کی قیادت کریں گے۔
کپتان سلمان علی آغا کا کہنا ہے کہ ’گزشتہ 6 ماہ کے دوران ہم نے اچھی کرکٹ کھیلی اور کھلاڑی مکمل طور پر تیار ہیں۔
انہوں نے بتایا کہ وہ نمبر تین پر ہی بیٹنگ جاری رکھیں گے اور ’فی الحال ٹیم کمبی نیشن میں تبدیلی کی ضرورت محسوس نہیں ہو رہی۔‘
ان کا کہنا تھا کہ ہدف تمام میچز میں کامیابی حاصل کرنا ہے۔ ایک سوال کے جواب میں کپتان نے واضح کیا کہ ’ٹیم میں وہی کھلاڑی شامل ہوگا جو بہترین فارم میں ہوگا، چاہے وہ فخر زمان ہوں یا بابر اعظم۔‘
میچ کے دوران موسم بھی خبروں میں ہے، کیونکہ بارش کا امکان ظاہر کیا جا رہا ہے جس سے کھیل متاثر ہونے کا خدشہ ہے۔
ٹی ٹوئنٹی ورلڈ کپ کے افتتاحی مقابلے سمیت پہلے دن مجموعی طور پر تین میچز کھیلے جائیں گے۔ میگا ایونٹ میں 20 ٹیموں کو چار گروپس میں تقسیم کیا گیا ہے۔
آج کے دیگر میچز میں ویسٹ انڈیز اور سکاٹ لینڈ آمنے سامنے ہوں گے جبکہ انڈیا کی ٹیم امریکہ کے خلاف میدان میں اترے گی۔
