سعودی سفیر اور وزیراعلٰی پنجاب کے درمیان ملاقات، پانچ امدادی ٹرک پی ڈی ایم اے کے حوالے

کنگ سلمان ایڈ اینڈ ریلیف سینٹر کی جانب سے پنجاب کے سات اضلاع کے سیلاب متاثرین کے لیے امدادی سامان کے پانچ ٹرک پہنچ گئے ہیں۔

پیر کو وزیراعلٰی مریم نواز شریف کی موجودگی میں سعودی سفیر سعید بن نواف المالکی نے امدادی سامان کے پانچ  ٹرک قدرتی آفات سے نمٹنے کے ادارے پی ڈی ایم اے کے سپرد کرد یے۔

اس تقریب میں کنٹری ڈائریکٹر عبداللہ البقمی اور پی ڈی ایم اے کے حکام بھی شریک تھے۔

کنگ سلمان ایڈ اینڈ ریلیف سینٹر کی جانب سے امدادی سامان 10 ہزار شیلٹر کٹس اور 10 ہزار فوڈ پیکجز پر مشتمل ہے۔

کنگ سلمان ایڈ اینڈ ریلیف سینٹر نے سیلاب متاثرین کو خیمے، سولر پینلز، ایل ای ڈی، کچن سیٹ، کمبل اور دیگر اشیاء کا تحفہ دیا۔

یہ امدادی سامان قصور، جھنگ، خانیوال، حافظ آباد، چنیوٹ، ملتان اور ٹوبہ ٹیک سنگھ کے سیلاب متاثرین کو امدادی سامان دیا جائے گا۔

شیلٹر کٹ میں خیمہ، سولر پینل ، ایل ای ڈی لائٹس، دو تھرمل کمبل، پلاسٹک میٹ، پائیدار کچن سیٹ، واٹر کولر اور اینٹی بیکٹیریل صابن شامل ہیں۔

95 کلوگرام فوڈ پیکچ میں آٹا، چینی، دال چنا اور کوکنگ آئل شامل ہے۔

امدادی سامان پی ڈی ایم اے اور کنگ سلمان ریلیف اور حیات فاؤنڈیشن کے اشتراک سے تقسیم کیا جائے گا۔

’شدید سیلاب کے دوران سعودی عرب کی بروقت امداد حقیقی بھائی چارے کی علامت ہے‘

سعودی سفیر نواف بن سعید المالکی اور پنجاب کی وزیراعلٰی مریم نواز کے درمیان ملاقات بھی ہوئی۔

 ملاقات میں باہمی تعلقات، سیلاب متاثرین کی امداد، اقتصادی تعاون اور علاقائی صورتحال پر تبادلہ خیال کیا گیا۔

مریم نواز نے سیلاب زدگان کے لیے امدادی سامان سعودی عرب کی پاکستان کے ساتھ اخوت اور بھائی چارے تسلسل کی عکاسی کرتا ہے۔

وزیراعلٰی مریم نواز شریف کا خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کو خراج تحسین پیش کیا۔

انہوں نے کہا کہ خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کی قیادت امت مسلمہ کے لیے مشعلِ راہ ہے۔

ان کا کہنا تھا کہ سعودی قیادت کا وژن، ہمدردی اور بصیرت مسلم امہ کو وحدت اور ترقی کی طرف لے جا رہی ہے-

’پنجاب میں شدید سیلاب کے دوران سعودی عرب کی بروقت امداد حقیقی بھائی چارے کی علامت ہے۔ سعودی عرب  کی جانب سے 10 ہزار فوڈ باسکٹ اور 10 ہزار شیلٹر/کیمپ کی فراہمی پر شکر گزار ہیں۔‘ 

انہوں نے کہا کہ سعودی تعاون متاثرہ خاندانوں کے لیے ریلیف اور ہمیشہ یکجہتی کی علامت کے طور پر یاد رکھا جائے گا۔

سیلابی صورتحال نے پھر سے ثابت کیا کہ ’پاک سعودی تعلقات سٹریٹیجک نہیں بلکہ حقیقی اخوت و بھائی چارے پر استوار ہے۔ آزمائش کی گھڑی میں سعودی عرب نے ایک بار پھر حقیقی برادر ملک کے طور پر ساتھ دیا ہے۔‘