یونائیٹڈ ایئرلائنز کے طیارے کی جاپان کے ایئرپورٹ پر ہنگامی لینڈنگ، دو افراد زخمی

جاپانی خبر رساں ایجنسی کیوڈو کے مطابق فلپائن کے شہر سیبو جانے والی امریکہ کی یونائیٹڈ ایئرلائنز کی پرواز نمبر 32 کو جمعے کی رات اوساکا کے ایک ایئرپورٹ پر ہنگامی لینڈنگ کرنا پڑی، جبکہ واقعے میں دو افراد کو معمولی چوٹیں آئیں۔

برطانوی خبر رساں ادارے روئٹرز کے مطابق سرکاری خبر رساں ادارے این ایچ کے نے بتایا ہے کہ یہ بوئنگ 737 طیارہ ٹوکیو کے قریب ناریٹا ایئرپورٹ سے اُڑا تھا، لیکن بحرالکاہل کے اوپر پرواز کے دوران کارگو میں آگ لگنے کا الارم بجا، جس کے بعد مقامی وقت کے مطابق شام سات بجے کے بعد طیارے نے کانسائی انٹرنیشنل ایئرپورٹ پر ایمرجنسی لینڈنگ کی۔۔

طیارے میں موجود تمام 142 مسافروں اور عملے کے افراد کو ہنگامی سلائیڈز کے ذریعے باحفاظت باہر نکال لیا گیا۔

روئٹرز نے واقعے کے بعد کانسائی ایئرپورٹ، مقامی پولیس، فائر ڈیپارٹمنٹ، یونائیٹڈ ایئرلائنز اور جاپانی وزارتِ ٹرانسپورٹ سے رابطے کی کوشش کی، مگر دفتری اوقات کے بعد فون پر کوئی جواب نہ مل سکا۔