ریاض: انٹرنیشنل فالکن اینڈ ہنٹنگ میلہ شروع، 45 ممالک کے شائقین شریک

انٹرنیشنل باز و شکار میلہ 2025 کا آغاز ریاض کے شمالی علاقہ ملھم میں ہو گیا ہے۔ انٹرنیشنل سعودی فالکن میلہ 11 اکتوبر تک جاری رہے گا۔ میلے میں 45 ممالک سے تعلق رکھنے والے 1300 افراد شرکت کررہے ہیں ۔

سعودی خبررساں ایجنسی’ ایس پی اے‘ کے مطابق سعودی فالکن کلب کے سی ای او طلال الشمیسی کا کہنا تھا کہ میلہ عالمی طور پر مقبول ہے اس کے ذریعے دنیا کو بازوں کے حوالے سے سعودی ثقافت و ورثے کے بارے میں وسیع و مستند معلومات حاصل ہوتی ہیں ۔

 سی ای او کا مزید کہنا تھا کہ باز میلے میں جہاں انواع و اقسام کے بازوں کا تعارف پیش کیا جاتا ہے وہاں مختلف نوعیت کی تفریحی و تعلیمی سرگرمیاں بھی منعقد کی جاتی ہیں جن کا مقصد آنے والی نسلوں کو مقامی ثقافت سے روشناس کرانا ہے۔

میلے میں امسال متعدد نئے پویلین کا اضافہ کیا گیا ہے جن میں مختلف علاقوں اور ممالک  کے بازوں کے کارنر قائم کیے گئے ہیں۔ خاص طور پر ’منگولین باز‘ کے عنوان سے ایک پویلین کا اضافہ بھی امسال کیا گیا ہے۔ 

علاوہ ازیں چینی پویلین بھی قائم کیا گیا ہے جبکہ نجران کے تاریخی علاقے کے حوالے سے بھی خصوصی کارنر کا انتظام کیا ہے۔

فالکن میلے میں ’مستقبل کے بازبانوں کا گاوں ‘ کے عنوان سے بھی خصوصی پویلین بنایا گیا ہے ۔

بازوں کی اشیا کے اسٹال بھی لگائے گئے ہیں جبکہ قدیم وکلاسیکل گاڑیوں کی نمائش کا بھی خصوصی انتظام کیا گیا ہے۔

میلے میں ہونے والی دیگر سرگرمیوں میں تیر اندازی اور نشانہ بازی کے ساتھ ساتھ گھڑ سواری اور بازوں کی نیلامی کے لیے بھی جگہ مخصوص ہے۔

باز و شکار میلے کے ایک مخصوص علاقے پر بچوں کی دلچسپی کے لیے  ’سفاری پارک‘ بھی بنایا گیا ہے جہاں انواع واقسام کے پرندوں کو رکھا گیا ہے۔

رکھے گئے پرندوں کی تفصیلات بھی درج کی گئی ہیں جن میں یہ بتایا گیا ہے کہ یہ پرندے کن علاقوں میں پائے جاتے ہیں اور کس طرح کا ماحول انکی پرورش و نشو و نمو کے لیے موزوں ہوتا ہے۔

گزشتہ برسوں کی طرح امسال بھی بازوں کے مقابلہ کا خصوصی اہتمام کیا گیا ہے جو 5 سے 10 اکتوبر تک ہوں گے ۔

مقابلے کے لیے بازوں کی  6 اقسام کا انتخاب کیا گیا ہے ۔ مقابلے کے مجموعی انعامات کی مالیت 6 لاکھ ریال رکھی گئی ہے۔