مسجد الحرام میں ازدحام کی صورتحال کا جائزہ لینے کے لیے انٹر ایکٹو سکرینیں

مسجد الحرام مکہ مکرمہ میں عمرہ  زائرین کی سہولت کے لیے طواف بیت اللہ اور مسعی (صفا، مروہ) کے مقامات پر ازدحام کی براہ راست صورتحال کا جائزہ لینے کے لیے مختلف مقامات پر انٹر ایکٹو سکرینیں نصب کی گئی ہیں۔

الاخباریہ کے مطابق ان سکرینوں پر طوافِ خانہ کعبہ کے براہ راست مناظر دکھائے جاتے ہیں، اس کا مقصد طواف کے لیے آنے والوں کو یہ سہولت فراہم کرنا ہے کہ وہ ازدحام کو دیکھتے ہوئے طواف کا آغاز کریں یا کچھ دیر انتظار کریں۔

مسجد الحرام کی انتظامیہ کی جانب سے سکرینز پر صورتحال دیکھ کر عمرہ زائر کو یہ فیصلہ کرنا آسان ہوجاتا ہے کہ وہ بالائی منزل کا رخ کرے یا رش کم ہونے کا انتظار کرے۔

مانیٹرنگ سکرینز کی سہولت مسجد الحرام کے بیرونی دروازوں پر بھی ہے۔

علاوہ ازیں مرکزی دروازوں پر خصوصی سگنلز کے ذریعے مسجد الحرام کے اندر گنجائش کے بارے میں معلومات فراہم کی جاتی ہے۔

مسجد الحرام کے اندر زائرین کی بڑی تعداد ہونے کی صورت میں مرکزی دروازوں پر سرخ لائٹس روشن ہو جاتی ہیں جنہیں دیکھ کر زائرین سمجھ جاتے ہیں کہ اندر اضافی جگہ نہیں ہے۔

حج سیزن میں عازمین کو سہولت ہوتی ہے اور وہ ازدحام کی صورتحال دیکھ کر مسجد الحرام کے اندر جاتے یا باہر ہی انتظار کرتے ہیں۔