ریاض سیزن 2025 کا باقاعدہ آغاز: افتتاحی پریڈ میں شہریوں کی بھرپور شرکت

ریاض سیزن 2025 کا باقاعدہ آغاز آج شاندار  پریڈ سے ہو گیا ہے۔ پریڈ کا آغاز ’ارینا کنگڈم ‘ سے ہوا جو ’بولیوارڈ ورلڈ‘ تک جائے گی۔ افتتاحی تقریب میں 25 سے زائد فلوٹس و ہزاروں فنکاروں نے شرکت کی۔

اخبار 24 کے مطابق تفریحی اتھارٹی کے چیئرمین ترکی آل الشیخ نے خادم حرمین شریفین شاہ سلمان بن عبدالعزیز آل سعود اور ولی عہد و وزیراعظم شہزادہ محمد بن سلمان بن عبدالعزیز آل سعود کا خصوصی شکریہ ادا کیا جن کی سرپرستی اور بھرپور تعاون سے مملکت میں تفریحی صنعت تیزی سے پروان چڑھ رہی ہے۔

ریاض سیزن کے چھٹے ایڈیشن کی افتتاحی تقریب کے حوالے سے ہونے والی پریڈ کو ایک تاریخ قرار دیا جا رہا ہے۔ افتتاحی پریڈ میں خواتین، نوجوانوں اور بچوں سمیت مختلف طبقہ فکر سے تعلق رکھنے والوں سے بھرپور شرکت کی۔

افتتاحی تقریب کے سلسلے میں ہونے والی پریڈ میں ریاض سیزن کے مختلف ایونٹس اور مقامات کی نمائندگی کرنے والے فلوٹس بھی شامل تھے جنہیں دیکھ کر اندازہ لگایا جا سکتا ہے کہ سیزن میں کیا کچھ دیکھنے کو ملے گا۔

ریاض سیزن 2025 کی افتتاحی  تقریب میں پہلی بار بہت بڑے غبارے متعارف کرائے گئے جن کی وجہ سے ایک منفرد منظر دیکھنے کو ملا۔

قبل ازیں افتتاحی تقریب کے حوالے سے ترکی آل الشیخ کا کہنا تھا کہ ’سیزن کی افتتاحی پریڈ انتہائی منفرد ہوگی جسے امریکہ کی معروف کمپنی ’میسیز‘ کے تعاون سے پیش کیا جائے گا۔‘