انڈیا: بیوی کو اینستھیزیا سے موت کے گھاٹ اتارنے کے الزام میں ڈاکٹر شوہر گرفتار

انڈیا کے شہر بنگالورو سے تعلق رکھنے والے ایک سرجن کو اپنی ڈاکٹر بیوی کے قتل کے الزامات کا سامنا ہے جن کو انہوں نے مبینہ طور پر اینستھیزیا  کی زیادہ مقدار دے کر مار ڈالا۔

اخبار ٹائمز آف انڈیا کے مطابق مبینہ قتل کا واقعہ رواں سال اپریل میں پیش آیا تھا جبکہ پولیس نے فرانزک رپورٹ آنے کے بعد ملزم کو دو روز قبل منگل کو گرفتار کیا ہے۔

فرانزک کی رپورٹ میں واضح ہے کہ 24 سالہ بیوی کریتیکا ریڈی کی ہلاکت اینستھیزیا سے ہوئی تھی جس کی جسم میں موجودگی کی تصدیق بھی ہوئی ہے۔

31 سالہ ڈاکٹر ماہیندرا ریڈی وکٹوریا ہسپتال کےگیسٹرو اینٹرالوجی اینڈ آرگن ٹرانسپلانٹ انسٹی ٹیوٹ میں بطور سرجن کام کرتے ہیں جبکہ ان کی بیوی کریتیکا ڈرمیٹولوجسٹ تھیں۔

ڈکٹر ماہیندرا پر الزام عائد کیا گیا ہے کہ انہوں نے اپنی 28 سالہ اہلیہ کریتیکا ریڈی کو قتل کیا ہے جن سے انہوں نے گزشتہ سال مارچ میں شادی کی تھی۔

سٹی پولیس کمشنر سیمنت کمار سنگھ نے ملزم کو گرفتار کرتے ہوئے کہا کہ فرانزک کی رپورٹ میں پرپوفول اینستھیزیا کی موجودگی کی تصدیق ہوئی ہے جو دراصل سرجری سے پہلے مریض کو بےہوش کرنے کے لیے لگایا جاتا ہے۔

پولیس کا کہنا ہے کہ کریتیکا ریڈی کی ہلاکت کے بعد غیر فطری موت کا مقدمہ درج کیا گیا لیکن فرانزک کی رپورٹ کے بعد مقتولہ کے والد نے ایک نیا مقدرمہ درج کروایا ہے جس میں ’داماد پر اینستھیزیا یادہ مقدار میں دینے اور قتل کا الزام عائد کیا ہے۔‘

پولیس تحقیقات کے مطابق ماہیندرا ریڈی 24 اپریل کو اپنی اہلیہ کریتیکا کو کیویری ہسپتال لائے تھے اور کہا کہ وہ گھر میں تھیں جب بے ہوش ہو کر گر پڑیں۔

تاہم ہسپتال پہنچنے پر ڈاکٹرز نے کریتیکا کو مردہ قرار دے دیا۔

ہسپتال کی جانب سے ڈیتھ سرٹیفیکیٹ جاری کیا گیا جس کے آٹاپسی لازمی قرار دی گئی اگرچہ ماہیندرا نے ہسپتال انتظامیہ کو ایسا کرنے سے روکنے کی بھرپور کوشش کی۔

انہوں نے اپنے سسر سے بھی اصرار کیا کہ وہ پولیس سے آٹاپسی نہ کروانے کی درخواست کریں۔

ایڈیشنل کمشنر پولیس کے مطابق اہل خانہ کے اعتراض کے باوجود آٹاپسی کی گئی اور یہ ضروری اس لیے بھی تھا کیونکہ ہسپتال کی طرف سے ڈیتھ سرٹیفیکیت جاری ہو چکا تھا۔

پولیس کا کہنا ہے کہ سرجن شوہر نے بتایا کہ ان کی بیوی کو کافی عرصے سے معدے کا مسئلہ تھا جس کا وہ علاج کر رہے تھے۔

پولیس ذرائع کا کہنا ہے کہ کریتیکا کی طویل علالت کے باعث ان کے شوہر کافی پریشان تھے اور یہی بات شاید قتل کی وجہ بنی۔

’شادی کے فوراً بعد ماہیندرا کو معلوم ہوا کہ کریتیکا کوصحت کے مختلف مسائل کا سامنا ہے بشمول بلڈ پریشر کا کم رہنا اور معدے کا مسئلہ۔ وہ کریتیکا کے والدین سے ناراض بھی تھے کہ انہوں نے اپنی یٹی کی بیماری سے متعلق چھپائے رکھا تھا۔‘

ان کے والد منی ریڈی نے پولیس سٹیشن میں دائر اپنی درخواست میں کہا ہے کہ ماہیندرا ریڈی اپنی بیوی کریتیکا سے اکثر پیسے بھی مانگا کرتے تھے۔ والد نے اپنی درخواست میں مطالبہ کیا ہے کہ ان کی بیٹی کے قتل کے الزام میں شوہر ماہیندرا کے خلاف قانونی کارروائی کی جائے۔