ٹی20 اور ٹیسٹ کا امتزاج: کرکٹ کا نیا فارمیٹ ’ٹیسٹ 20‘ متعارف، قوانین اور تبدیلیاں کیا ہیں؟

کھیل کی دنیا میں کرکٹ کا ایک نیا فارمیٹ متعارف کروایا گیا ہے جسے ٹیسٹ ٹوئنٹی کا نام دیا گیا ہے۔

ٹیسٹ ٹوئنٹی کرکٹ ویب سائٹ کے مطابق اس فارمیٹ کو کرکٹ کے ارتقا کا اگلا سنگِ میل قرار دیا جا رہا ہے اور یہ ایسا طرزِ کرکٹ ہو گا جو ٹیسٹ کی حکمتِ عملی کو ٹی ٹوئنٹی کی شدت اور رفتار سے جوڑے گا۔

یہ کرکٹ کی تاریخ کا پہلا 80 اوورز پر مشتمل فارمیٹ ہوگا جس میں ہر ٹیم 20، 20 اوورز کی دو اننگز کھیلے گی، اور پہلی اننگز کے رنز دوسری اننگز میں بھی شامل کیے جائیں گے۔

ایک ہی دن میں مکمل ہونے والا یہ میچ نتیجہ خیز، تیز اور حکمتِ عملی سے بھرپور ہوگا، جس کا نتیجہ جیت، ہار، ٹائی یا ڈرا، سب ممکن ہیں۔

نئی نسل کے لیے نیا کھیل

ٹیسٹ ٹوئنٹی خاص طور پر 13 سے 19 سال کے نوجوان کرکٹرز کے لیے ڈیزائن کیا گیا ہے۔ دنیا بھر کے نوجوانوں کو ایک ایسا عالمی پلیٹ فارم دیا جائے گا جہاں وہ اپنی صلاحیت کو آزما سکیں۔ 

نئی ٹیکنالوجی کے ساتھ نیا تصور

ٹیسٹ ٹوئنٹی کے مرکز میں ایک جدید مصنوعی ذہانت پر مبنی سکاؤٹنگ اور اینالٹکس سسٹم ہے، جو موشن سینسرز، ڈیٹا انٹیلیجنس اور پلیئر پروفائلنگ پر کام کرے گا۔

یہ نظام ٹیلنٹ کی تلاش اور ترقی کے طریقوں کو بدل دے گا، انتخابی عمل کو شفاف، میرٹ پر مبنی اور عالمی سطح پر قابلِ اعتماد بنائے گا۔

نیا ٹورنامنٹ: جونیئر ٹیسٹ ٹوئنٹی چیمپئن شپ

جنوری 2026 میں ’جونیئر ٹیسٹ ٹوئنٹی چیمپئن شپ‘ کا آغاز ہو گا جس میں چھ نمایاں فرنچائزز حصہ لیں گی۔ ان ٹیموں میں بین الاقوامی اور انڈین کھلاڑی شامل ہوں گے جو ایک ہی دن میں مکمل ہونے والے میچز میں ٹرافی کے لیے مدمقابل ہوں گے۔

ٹیسٹ ٹوئنٹی کا فارمیٹ 

یہ درمیانی طرز (Middle-form) کی کرکٹ ہے جو نہ ٹیسٹ کی طرح پانچ دن کا، نہ ٹی ٹوئنٹی کی طرح مختصر ہے۔ اس نئے چوتھے فارمیٹ میں دونوں ٹیموں کو 20، 20 اوورز کی دو اننگز ملیں گی، اور کل 80 اوورز پر مشتمل میچ ایک دن میں مکمل ہوگا۔

اس کرکٹ میں پہلی اننگز کے رنز دوسری میں شامل ہوں گے فالو آن ممکن ہوگا۔ میچ کا نتیجہ جیت، ہار، ٹائی یا ڈرا کی صورت میں آسکتا ہے اور  ٹائی کی صورت میں ’سپر اوور‘ کھیلا جائے گا۔ ڈرا کے لیے ضروری ہے کہ آخری گیند تک دوسری ٹیم کے کم از کم پانچ وکٹ باقی ہوں۔

فرنچائزز اور شریک ملک

ابتدائی مرحلے میں چھ فرنچائزز شامل ہوں گی، تین بین الاقوامی اور تین انڈین۔ 

اس لیگ کا سب سے منفرد پہلو ’کو اونرشپ‘ ماڈل ہے، جس کے تحت ہر فرنچائز کے شریک مالکان مشہور کرکٹرز، اداکاروں، کاروباری شخصیات اور عالمی ستاروں کے بیٹے یا بیٹیاں ہوں گے۔ 

عالمی انتخابی عمل

ٹیسٹ ٹوئنٹی کے کھلاڑیوں کے انتخاب کا عمل مکمل طور پر ڈیجیٹل اور شفاف ہوگا۔ امیدواروں کی رجسٹریشن ٹیسٹ ٹوئنٹی کی ویب سائٹ  پر ہوگی۔ تسلیم شدہ کوچز یا کرکٹرز کی سفارش پر کھلاڑیوں کو ’ڈائریکٹ انٹری روٹ‘ جبکہ دیگر کو ’سٹینڈرڈ انٹری روٹ‘ کے تحت موقع ملے گا۔

مصنوعی ذہانت پر مبنی ٹرائلز اور انٹیلی جنس انڈیکس کے ذریعے 1000 کھلاڑیوں کا انتخاب ہوگا، جن میں سے 300 ’گلوبل آکشن پول‘ میں جائیں گے، جہاں چھ فرنچائزز کل 96 کھلاڑی (ہر ٹیم کے لیے 8 انڈین اور 8 غیر ملکی) منتخب کریں گی۔ 

باقی کھلاڑی ’وائلڈ کارڈ پول‘ میں رہیں گے تاکہ ہر باصلاحیت نوجوان کو موقع مل سکے۔

اہم قوانین 

پاور پلے: ہر ٹیم کو میچ میں صرف ایک پاور پلے ملے گا جو چار اوورز پر مشتمل ہوگا، اور اس دوران صرف دو فیلڈر 30 گز کے دائرے سے باہر ہوں گے۔

فالو آن: اگر دوسری ٹیم پہلی اننگز کے بعد 75 رنز سے پیچھے ہو تو پہلی ٹیم فالو آن نافذ کر سکتی ہے۔

ارلی کولیپس کلاز: اگر کوئی ٹیم 10 اوورز سے پہلے آل آؤٹ ہو جائے تو مخالف ٹیم کو اتنے اضافی اوورز دیے جائیں گے جتنے بچ گئے تھے (زیادہ سے زیادہ تین)۔

بولنگ الاؤنس: ہر ٹیم زیادہ سے زیادہ پانچ بولرز استعمال کر سکتی ہے، اور ہر بولر مجموعی طور پر آٹھ اوورز کر سکتا ہے۔

وائیڈ اور نوبال قوانین: یہ قانون ٹی ٹوئنٹی کی طرح لاگو ہوں گے، لیکن اگر ایک اوور میں تین یا زیادہ نوبالز یا وائیڈز ہوں تو بیٹنگ ٹیم کو اضافی تین رنز دیے جائیں گے۔

ڈرا کا اصول: اگر دوسری اننگز میں بیٹنگ کرنے والی ٹیم کے پانچ سے کم وکٹ گریں تو میچ ڈرا قرار دیا جا سکتا ہے۔

ٹائم کنٹرول: ہر اننگز مقررہ وقت میں مکمل نہ ہونے پر 5 رنز کا جرمانہ اور ایک ٹائم آؤٹ ضبط کیا جائے گا۔

ٹائی: اگر دونوں ٹیموں کے مجموعی رنز برابر ہوں تو ’سپر سیشن‘یعنی ایک اوور کا فیصلہ کن مقابلہ ہوگا۔