تین میچوں پر مشتمل ٹی20 سیریز کے دوسرے میچ میں پاکستان نے جنوبی افریقہ کو نو وکٹوں سے شکست دے دی ہے۔
جمعے کو قذافی سٹیڈیم لاہور میں 111 رنز کا ہدف پاکستان نے 14 اوورز میں ایک وکٹ کے نقصان پر حاصل کیا۔
مزید پڑھیں
پاکستان کی جانب سے صائم ایوب نے شاندار 71 رنز کی اننگز کھیلی جبکہ فہیم اشرف اور سلمان مرزا کی تباہ کن بولنگ نے جنوبی افریقہ کی بیٹنگ لائن کی کمر توڑ دی۔
اس سے قبل جنوبی افریقہ کی پوری ٹیم 20 ویں اوور میں 110 رنز پر ڈھیر ہوگئی تھی۔
پاکستان کی اننگز
پاکستان نے اننگز کا آغاز کیا تو صاحبزادہ فرحان اور صائم ایوب نے پہلے سات اوورز تک بغیر کسی نقصان کے 54 رنز بنائے۔
پاکستان کو پہلا نقصان ساتویں اوور میں 54 رنز کے مجموعی سکور پر صاحبزادہ فرحان کی صورت میں ہوا، وہ تین چھکوں کی مدد سے 28 رنز بنا کر آؤٹ ہوئے۔
اوپنر صائم ایوب طویل عرصے بعد فارم میں نظر آئے، انہوں نے پانچ چھکوں اور چھ چوکوں کی مدد سے 71 رنز کی ناقابل شکست اننگز کھیلی۔
ون ڈاؤن پر آنے والے بابر اعظم نے 11 رنز بنائے اور اس طرح انٹرنیشنل ٹی20 میچز میں سب سے زیادہ رنز بنانے والے کھلاڑی بن گئے ہیں۔
بابر اعظم کو روہت شرما کا ریکارڈ توڑنے کے لیے صرف 9 رنز درکار تھے، چانچہ انہوں نے جنوبی افریقہ کے خلاف 18 گیندوں پر 11 رنز کی اننگز کھیل کر یہ کارنامہ سرانجام دیا۔
انہوں نے روہت شرما کا 159 میچوں میں 4 ہزار 231 رنز کا ریکارڈ توڑا۔ بابر اعظم نے یہ اعزاز 130 میچوں میں 4232 رنز بنا کر اپنے نام کیا۔
جنوبی افریقہ کی جانب سے کاربن بوش نے ایک وکٹ حاصل کی۔
جنوبی افریقہ کی اننگز
جنوبی افریقہ نے اننگز کا مایوس کن آغاز کیا، اوپنر ریزا ہینڈرکس صفر پر آؤٹ ہو گئے۔ یوں پہلے نقصان کے بعد کوئی بھی کھلاڑی زیادہ دیر تک وکٹ پر نہ ٹک سکا۔
جنوبی افریقہ کی جانب سے کوئنٹن ڈی کوک سات، ٹونی ڈی زورزی سات، میتھیو بریٹزکے پانچ، ڈیوالڈ بریوس 25، کپتان ڈونووان فریرا 15، جارج لنڈے نو، کاربن بوش 11، نانڈرے برگر نو، اوٹنیل بارٹمین 12 رنز بنا کر آؤٹ ہوئے جبکہ لنگی نینگیڈی سات رنز کے ساتھ ناٹ آؤٹ رہے۔
پاکستان کی جانب سے فہیم اشرف نے چار، سلمان مرزا نے تین، نسیم شاہ نے دو جبکہ ابرار احمد نے ایک وکٹ حاصل کی۔
اس سے قبل پاکستان نے ٹاس جیت کر جنوبی افریقہ کے خلاف فیلڈنگ کا فیصلہ کیا تھا۔
Babar Azam becomes the leading run-scorer in T20 Internationals #PAKvSA | #GreenPeYaqeen | #BackTheBoysInGreen pic.twitter.com/950amHyfTV
— Pakistan Cricket (@TheRealPCB) October 31, 2025
واضح رہے کہ پہلے ٹی ٹی20 میچ میں جنوبی افریقہ نے پاکستان کو 55 رنز سے شکست دی تھی۔
دونوں ٹیموں کے درمیان اب تک کھیلے گئے 26 ٹی 20 میچز میں سے 13 جنوبی افریقہ کے نام رہے جبکہ 13 میچز میں پاکستان نے کامیابی سمیٹی۔
پاکستان کی پلیئنگ الیون
اس میچ میں پاکستان کی پلیئنگ الیون میں صائم ایوب، صاحبزادہ فرحان، بابر اعظم، سلمان علی آغا (کپتان)، عثمان خان، حسن نواز، محمد نواز، فہیم اشرف، نسیم شاہ، سلمان مرزا اور ابرار احمد شامل تھے۔
جنوبی افریقہ کی پلیئنگ الیون
اس میچ میں جنوبی افریقہ کی پلیئنگ الیون کوئنٹن ڈی کوک، ریزا ہینڈرکس، ٹونی ڈی زورزی، ڈیوالڈ بریوس، میتھیو بریٹزکے، ڈونووان فریرا (کپتان)، جارج لنڈے، کاربن بوش، اوٹنیل بارٹمین، نانڈرے برگر اور لنگی نینگیڈی پر مشتمل تھی۔
