سعودی ایجاد ،حجاج کو گرمی سے محفوظ رکھنے والا ’ ٹھنڈا احرام‘
سعودیہ ایئرلائن کی جانب سے عازمین کو دیگر سہولیات بھی فراہم کی جاتی ہیں(فوٹو،ایکس)
سعودیہ ایئرلائن کے ڈائریکٹرتعلقات عامہ انجینئرعبداللہ الشھرانی کا کہنا ہے کہ ’ایئرلائن کی جانب سے فراہم کیا جانے والا ٹھنڈا احرام حجاج و عمرہ زائرین کو بہت حد تک گرمی سے محفوظ رکھنے میں معاون ثابت ہوتا ہے‘۔
اخبار 24 سے گفتگو کرتے ہوئے الشھرانی نے مزید بتایا کہ ’ سعودیہ ایئرہمیشہ سے ہی عازمین حج وعمرہ زائرین کو بہتر خدمات فراہم کرنے کے لیے کوشاں ہے، احرام کے علاوہ عازمین کے سفر حج کو آسان بنانے کےلیے متعدد اقدامات کیے گئے ہیں جن میں سامان کے بغیر حج کی سہولت قابل ذکر ہے جس کے تحت عازمین کی آمد و رفت کو آسان بنایا گیا ہے۔ اس اقدام کے تحت عازمین کا سامان کو انکی رہائش گاہوں سے وصول کرکے کارگو سیکشن کو بھیج دیا جاتا ہے‘۔
الشھرانی کا مزید کہنا تھا کہ ’عازمین کی سہولت کے لیے فلائنگ ٹیکسی کی سہولت فراہم کرنے کے لیے بھی کوشاں ہیں جس کے ذریعے انہیں ایئرپورٹ سے مکہ مکرمہ یا مدینہ منورہ باسانی منتقل کیا جا سکے گا‘۔
واضح رہے ’ٹھنڈا احرام ‘ سعودی ایجاد ہے جو جدید ترین ٹیکنالوجی سے تیار کیا گیا ہے۔ اس احرام کی تیاری میں جوفائبراستعمال کیا جاتا ہے اس میں یہ خاصیت ہے کہ وہ دھوپ کی تپش کو منعکس کرنے کی صلاحیت رکھتا ہے جس سے جسم کو گرمی کا احساس کم ہوجاتا ہے۔
