سعودی ولی عہد شہزادہ محمد بن سلمان اور صدر ٹرمپ کی وائٹ ہاؤس میں ملاقات

سعودی ولی عہد شہزادہ محمد بن سلمان اور امریکی صدر ٹرمپ نے منگل کو وائٹ ہاؤس کے اوول آفس میں باضابطہ ملاقات کی ہے۔

الاخباریہ  کے مطابق وائٹ ہاوس پہنچنے پر صدر ڈونلڈ ٹرمپ نے ان کا خیرمقدم کیا، اس موقعے پر باضابطہ استقبالیہ تقریب کا اہتمام کیا گیا۔

امریکی لڑاکا طیاروں نے خیرمقدمی تقریب کے دوران وائٹ ہاؤس کے اوپر سے فلائی پاسٹ کیا۔

طیاروں کا فلائی پاسٹ دونوں ملکوں کے درمیان سٹرٹیجک تعلقات کی مضبوطی اور گہرائی کو ظاہر کرتا ہے۔

قبل ازیں ایوان شاہی کے بیان میں کہا گیا کہ تھا کہ ’شاہ سلمان بن عبدالعزیز کی ہدایت اور امریکی صدر ڈونلڈ ٹرمپ کی جانب سے دی گئی دعوت پر ولی عہد سرکاری دورے پر روانہ ہوئے ہیں۔‘

ولی عہد شہزادہ محمد بن سلمان دورے کے دوران امریکی صدر ٹرمپ سے ملاقات کریں گے، جس میں سعودی عرب اور امریکہ کے درمیان تعلقات اور مختلف شعبوں میں انہیں بڑھانے کے طریقوں پر تبادلہ خیال کیا جائے گا۔

دونوں رہنما مشتترکہ دلچسپی کے امور پر بھی بات چیت کریں گے۔

سعودی کابینہ کے اجلاس میں بتایا گیا کہ ’ولی عہد شہزادہ محمد بن سلمان کا دورہ امریکہ دونوں ملکوں کے باہمی تعلقات اور مختلف شعبوں میں سٹریٹجک شراکت داری مضبوط بنانے کے لیے ہے۔‘

’ اس کے ساتھ ایک محفوظ اور مستحکم مشرق وسطی کے حوالے سے مشترکہ وژن کے حصول کی کوشش بھی جاری رکھنا ہے۔‘