ولی عہد کا دورہ امریکہ دونوں ملکوں کے لئے سنگ میل ہے: شہزادی ریما

امریکہ میں سعودی سفیر شہزادی ریما بنت بندر بن سلطان بن عبد العزیز نے کہا ہے کہ ولی عہد و وزیر اعظم شہزادہ محمد بن سلمان بن عبد العزیز کا دورہ امریکہ دونوں ملکوں کے تعلقات کے لئے اہم سنگِ میل کی حیثیت رکھتا ہے۔

سبق ویب سائٹ کے مطابق انہوں نے کہا ہے کہ ’یہ دورہ دونوں ممالک کے درمیان اسٹریٹجک تعاون کے نئے اور وسیع افق کھولے گا‘۔

انہوں نے ولی عہد شہزادہ محمد بن سلمان کے خیر مقدم کا اظہار کرتے ہوئے کہا ہے کہ ’یہ تاریخی دورہ ریاض اور واشنگٹن کے درمیان گہری شراکت داری کا مظہر ہے‘۔

’اس بات کی تصدیق کرتا ہے کہ دونوں ملکوں کی قیادتیں باہمی مفادات کو مضبوط بنانے اور سیاسی، اقتصادی اور سکیورٹی تعاون کے نئے مرحلے کی جانب پیش قدمی کے لئے پُرعزم ہیں جس سے علاقائی اور عالمی استحکام کو تقویت ملے گی۔

انہوں نے مزید کہا ہے کہ ’اپنی جانب سے اور واشنگٹن میں موجود پوری سفارتی ٹیم کی جانب سے، میں ولی عہد کا خیرمقدم کرتی ہوں‘۔

یہ دورہ ہمارے لئے بے حد اہم ہے اور ہم اس سے توقع رکھتے ہیں کہ یہ دونوں دوست عوام کی خواہشات کے مطابق، دو طرفہ تعلقات کو مزید مؤثر اور وسیع تر سطح تک لے جائے گا‘۔