سعودی مسلح افواج کے چیف آف جنرل سٹاف کی فیلڈ مارشل عاصم منیر سے ملاقات
سعودی عرب کی مسلح افواج کے چیف آف جنرل سٹاف جنرل فیاض بن حمید الرویلی نے پاکستانی فوج کے سربراہ فیلڈ مارشل عاصم منیر سے ملاقات کی ہے۔
پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ ’پیر کو جی ایچ کیو میں ہونے والی ملاقات میں دونوں نے باہمی دلچسپی کے امور پر تبادلہ خیال کیا، خصوصاً پاکستان اور سعودی عرب کے درمیان دیرینہ اور تزویراتی عسکری تعاون کے فروغ پر زور دیا۔‘
’دونوں نے دفاعی تعاون، سکیورٹی اشتراک اور انسدادِ دہشت گردی کے شعبوں میں مزید بہتری کی اہمیت کو اجاگر کیا، جو دونوں برادر ممالک کے گہرے تعلقات کی بنیاد ہیں۔‘
بیان کے مطابق جنرل فیاض بن حمید الرویلی نے سعودی مسلح افواج کے ساتھ مختلف شعبوں میں پاکستان کے تعاون کو سراہا اور باہمی اشتراک کی مضبوط بنیادوں کو مزید مستحکم کرنے کے عزم کا اعادہ کیا۔
جی ایچ کیو پہنچنے پر جنرل فیاض بن حمید الرویلی نے یادگارِ شہدا پر پھولوں کی چادر چڑھائی۔ اس موقع پر پاکستانی فوج کے چاق و چوبند دستے نے انہیں گارڈ آف آنر پیش کیا۔
