سعودی وزیر داخلہ سے محسن نقوی کی ملاقات، سکیورٹی تعاون بڑھانے پر تبادلہ خیال
ملاقات میں مشترکہ دلچسپی کے متعدد امور پر بھی بات چیت کی گئی۔(فوٹو: ایس پی اے)
سعودی وزیرداخلہ شہزادہ عبدالعزیز بن سعود بن نایف نے پیر کو ریاض میں وزارت کے دفتر میں پاکستانی ہم منصب محسن نقوی کا خیرمقدم کیا ہے۔
ایس پی اے کے مطابق ملاقات میں دونوں ملکوں کے درمیان سکیورٹی تعاون کو بڑھانے کے طریقوں خصوصا منشیات کی سمگلنگ سے نمنٹے سے متعلق تبادلہ خیال کیا گیا۔
علاوہ ازیں مشترکہ دلچسپی کے متعدد امور پر بھی بات چیت کی گئی۔
سعودی وزیر داخلہ نے ایکس اکاونٹ پر لکھا’ قیادت کی ہدایت کے مطابق پاکستان کے وزیر داخلہ محسن نقوی سے ملاقات کی، متعدد سکیورٹی امور پر بات چیت کی گئی، مششرکہ اہداف کے حصول کے لیے دونوں ملکو ں کے سٹریٹیجک تعلقات کے فریم ورک کے اندر باہمی تعاون مضبوط بنانے پر زور دیا۔‘
نائب وزیر داخلہ ڈاکٹر عبدالعزیز بن محمد بن عیاف، معاون وزیر داخلہ ڈاکٹر ھشام بن عبدالرحمن الفالح، وزیرداخلہ کے دفتر کے مشیر لیفٹیننٹ جنرل سلیمان بن عبدالعزیز الیحیی، پاکستان میں سعودی سفیر نواف بن سعید المالکی اور وزارت داخلہ کے عہدیدار شریک تھے۔
ریاض میں پاکستان کے سفیر احمد فاروق، وزارت داخلہ اور انسداد منشیات کے انڈر سیکرٹری محمد خرم آغا بھی موجود تھے۔
