باہم جڑے ہوئے بچوں اور ان کے اہل خانہ نے بولیواڈ ورلڈ کا دورہ کیا

سعودی امدادی ایجنسی شاہ سلمان مرکز نے باہم جڑے ہوئے بچوں کو ان کے اہل خانہ سمیت ریاض سیزن میں بولیواڈ ورلڈ کا دورہ کرایا۔ ان باہم جڑے ہوئے بچوں کو مملکت میں کامیاب آپریشن کرکے جدا کیا گیا تھا۔

ایس پی اے کے مطابق بچوں اور ان کے اہل خانہ نے بولیواڈ ورلڈ میں مختلف ملکوں کی تہذیب و ثقافت کی نمائندگی کرنے والے ممالک کویت، انڈونیشیا، جنوبی کوریا، امریکہ ،مصر، میکسیکو وغیرہ کے ثقافتی ایریا کا دورہ کیا۔

بولیواڈ ورلڈ میں مختلف ملکوں کے زون قائم  ہیں، جہاں ان ملکوں کی ثقافت و تہذیب، پکوان اور فنون موسیقی وغیرہ سے متعارف کرایا جاتا ہے۔

بچوں نے اپنے اہل خانہ کے ہمراہ ڈالفن شو بھی دیکھا، جہاں وہ ڈولفن کی ذہانت اور پول انٹرایکٹیو پرفارمینس سے متاثر ہوئے۔

 بچوں اور ان کے اہل خانہ نے مملکت کے قائدین کا خصوصی شکریہ ادا کیا جنہوں نے بولیواڈ ورلڈ کے دورے کا اہتمام کرایا۔

یاد رہے اقوام متحدہ کے تحت ہرسال 24 نومبر کو جڑے ہوئے بچوں کا عالمی دن منایا جاتا ہے۔

اس دن کا مقصد جڑے ہوئے بچوں کے بارے میں شعور اجاگر کرنا اور ان بچوں کو جدا کرنے کی سرجری کے شعبے میں کامیابیوں کی ستائش کرنا ہے۔

1990 میں اس پروگرام کے آغاز کے بعد سے اب تک دنیا بھر کے ممالک سے تعلق رکھنے والے جڑے ہوئے بچوں کے تقریباً 136 آپریشن کیے گئے ہیں۔

اس پروگرام کے اخراجات مکمل طور پر سعودی حکومت کی طرف سے سپانسر کیے جاتے ہیں۔