سعودی عرب اور قطر کے درمیان ہائی سپیڈ ریل لِنک کے معاہدے پر دستخط

سعودی عرب اور قطر نے پیر کو ایک معاہدے پر دستخط کیے ہیں جس کے تحت خلیج کی دونوں ریاستوں کے درمیان اپنی نوعیت کا پہلا ہائی سپیڈ ریل لنک قائم کیا جائے گا۔

سعودی ولی عہد شہزادہ محمد بن سلمان اور امیر قطر شیخ تمیم بن حمد آل ثانی نے ریاض میں ملاقات کی ہے جو سعودی، قطری رابطہ کونسل کے فریم ورک کے تحت منعقد ہوئی۔

ریاض کے قصر یمامہ میں سعودی ولی عہد اور امیر قطر نے سعودی، قطری رابطہ کونسل کے آٹھویں اجلاس کی مشترکہ صدارت کی۔

بعد ازاں ولی عہد شہزادہ محمد بن سلمان اور شیخ تمیم بن حمد ال ثانی کی موجودگی میں سعودی وزیر ٹرانسپورٹ و لاجسٹک سروسز انجینیئرصالح الجاسر جبکہ قطری وزیرمواصلات شیخ محمد بن عبداللہ آل ثانی نے معاہدے پر دستخط کیے۔

ہائی سپیڈ ریلوے لنک ریاض کے کنگ سلمان انٹرنیشنل ایئرپورٹ کو دوحہ کے حمد انٹرنیشنل ایئرپور ٹ سے جوڑے گا، جس سے دونوں دارالحکومتوں کے درمیان سفر کا دورانیہ صرف دو گھنٹے رہ جائے گا۔

مشترکہ بیان کے مطابق یہ ریلوے پروجیکٹ چھ برس کے اندر مکمل ہونے کی توقع ہے۔ اس منصوبے سے دونوں ملکوں میں مجموعی طور پر 30 ہزار روزگار کے مواقع نکلنے کی توقع ہے۔

یہ منصوبہ آپریشنل ہونے پر سالانہ ایک کروڑ سے زیادہ مسافروں کو ٹرانسپورٹیشن کی سہولت فراہم کرے گا۔

ایس پی اے کے مطابق دونوں ملکوں کے درمیان ٹرانسپورٹیشن کا یہ منصوبہ دوطرفہ گہرے و مضبوط برادرانہ تعلقات کا عکاس ہے۔

ہائی سپیڈ ریلوے کے لیے ٹریک 785 کلومیٹر طویل ہوگا جو ریاض کو دوحہ سے جوڑے گا۔

سعودی، قطری ریلوے کا آغاز ریاض سے ہوگا جو الھفوف اور دمام سے ہوتی ہوئی حمد انٹرنیشنل ایئرپورٹ تک جائے گی۔ ریلوے دونوں ملکوں کے لیے ٹرانسپورٹیشن کا جدید اور اہم منصوبہ ہو گا۔

ریل کی انتہائی رفتار 300 کلو میٹر فی گھنٹہ ہوگی جس سے ریاض کا دوحہ تک کا سفر دو گھنٹے کا ہو جائے گا ۔ ریلوے منصوبے سے دوطرفہ تجارت و سیاحت کے علاوہ تجارت میں بھی خاطرخواہ اضافہ ہوگا۔

ریل کے ذریعے سالانہ 10 ملین مسافر مستفید ہوں گے جس سے مملکت اور قطر کی سیاحت کو بھی فروغ ملے گا۔ توقع ہے منصوبے کی تکمیل سے دونوں ممالک کی مجموعی جی ڈی پی کی مد 115 ارب ریال حاصل ہوں گے۔

دوطرفہ ریلوے منصوبہ جو چھ برسوں میں مکمل ہو گا جو سیفٹی کے اعتبار سے انتہائی اعلیٰ معیار کا ہو گا۔ منصوبے میں جدید ترین ٹیکنالوجی استعمال کی جائے جس سے کاربن کا اخراج کم ہو گا۔