جدہ فروری 2026 میں ای پری الیکٹرک ریس کی میزبانی کرے گا

جدہ کورنیش سرکٹ 13 اور 14 فروری کو ’جدہ ای پری‘ الیکٹرک ریس کی میزبانی کرے گا، جو اے بی بی ایف آئی اے فارمولا ای ورلڈ چیمپیئن شپ کے 12ویں سیزن کا حصہ ہے۔

سعودی پریس ایجنسی ایس پی اے کے مطابق یہ ایونٹ وزارت کھیل کی نگرانی میں منعقد ہوتا ہے اور اس کا انتظام سعودی آٹوموبائل اور موٹرسائیکل فیڈریشن کرتا ہے۔

ای پری الیکٹرک ریس ایک نئے تین کلومیٹر طویل ٹریک پر ہوگی جس میں 19 موڑ شامل ہیں، اور دلچسپی بڑھانے کے لیے اٹیک زون ٹرن 13 پر واقع ہے۔

ریس میں دنیا بھر سے 10 ٹیموں کے 20 ڈرائیور حصہ لیں گے، جن میں جیگوار، پورشے اور نِسان شامل ہیں۔

اس ایونٹ میں ایک ’فین زون‘ بھی ہوگا، جہاں خاندانوں کے لیے تفریحی اور انٹرایکٹیو سرگرمیاں فراہم کی جائیں گی، اس کے علاوہ بعد میں کنسرٹس کا بھی اعلان کیا جائے گا۔

گزشتہ سال کے ایڈیشن نے چیمپئن شپ کی تاریخ میں سب سے زیادہ ناظرین کا ریکارڈ قائم کیا، جس میں دنیا بھر میں 65 ملین افراد نے اسے دیکھا۔

سعودی آٹوموبائل اور موٹرسائیکل فیڈریشن اور سعودی موٹر سپورٹس کے چیئرمین شہزادہ خالد بن سلطان بن عبداللہ بن فیصل نے اس بات کی تصدیق کی کہ ریس کی میزبانی کا سلسلہ سعودی عرب میں موٹرسپورٹس کی تیز رفتار ترقی کی عکاسی کرتا ہے۔

فارمولا ای کے شریک بانی اور چیف چیمپئن شپ آفیسر البرٹو لونگو نے کہا کہ جدہ، اس سیزن کے کیلنڈر میں ایک اہم سٹاپ کے طور پر شمار ہوتا ہے۔

ریس کے چوتھے اور پانچویں راؤنڈ کے ٹکٹ وی بک پلیٹ فارم پر دستیاب ہیں۔ ٹکٹ حاصل کرنے کے لیے یہ لنک وزٹ کریں۔ قیمت 100 ریال سے شروع ہوتی ہے  اور خصوصی وی آئی پی ٹکٹ بھی دستیاب ہیں۔

ریس فلڈلائٹس میں منعقد ہوگی جس کے باعث جدہ اس سیزن کے کیلنڈر میں رات کو ریس کی میزبانی کرنے والا پہلا شہر بن گیا ہے۔