ایکسٹریم ایچ ورلڈ کپ: سعودی عرب میں ماحول دوست کار ریس
سعودی عرب کے قدیہ سٹی میں انٹرنیشنل آٹو موبائل فیڈریشن کا افتتاحی ایکسٹریم ایچ ورلڈ کپ 9 سے 11 اکتوبر تک منعقد ہو رہا ہے۔
سعودی پریس ایجنسی ایس پی اے کے مطابق ایف آئی اے ایکسٹریم ایچ ورلڈ کپ، جو دنیا کی پہلی ہائیڈروجن سے چلنے والی موٹر سپورٹ ہے، نے سعودی عرب کے قدیہ سٹی کو اپنے پہلے ایونٹ کی میزبانی کی تصدیق کی ہے۔
یہ ریس جبلِ تویق کے دلکش پس منظر میں منعقد ہوگی جو اس وقت دنیا کے ایک ممتاز موٹر سپورٹس مقام میں تبدیل ہونے کے عمل سے گزر رہا ہے۔
یہ دنیا کا پہلا شہر ہے جو مکمل طور پر تفریح کے لیے بنایا گیا ہے، جہاں کھیل اور ثقافت ایک ساتھ ملتے ہیں۔
اس وژن کا مرکز نیا متعارف ہونے والا ’سپیڈ پارک ٹریک‘ ہے، یہ ٹریک قدیہ سٹی کے عالمی معیار کی موٹر سپورٹ کے عزم کی علامت ہے، جس میں ڈرامائی تبدیلیاں، 20 منزلہ ’بلیڈ‘ ٹرن جیسی منفرد خصوصیات، اور نئے ’سکس فلیگز تھیم پارک‘ اور ’ایکوعریبیہ‘ جیسے تفریحی مقامات ہیں۔
ایف آئی اے ایکسٹریم ایچ ورلڈ کپ اور قدیہ سٹی پائیداری کے معیار کے حوالے سے ایک مشترکہ وژن رکھتے ہیں جو اس شہر کو ایکسٹریم ایچ کے کھیل اور صاف نقل و حمل کے حل فراہم کرنے کے مشن کے لیے ایک مثالی مقام بناتا ہے۔
یہ شہر 2060 تک زیرو کاربن اخراج حاصل کرنے کا ہدف رکھتا ہے، جس کے لیے 100 فیصد استعمال شدہ پانی کی دوبارہ صفائی، قابلِ تجدید توانائی کا انفراسٹرکچر، اور 80 فیصد پارکنگ مقامات پر الیکٹرک گاڑیوں کی چارجنگ جیسی اقدامات شامل ہیں۔
’ایکسٹریم ای‘ الیکٹرانک آف روڈ ریسنگ سیریز کی پہلی ریس چار سے پانچ اکتوبر کو منعقد ہوئی۔
اس ایونٹ کو کھیلوں کی وزارت کی نگرانی میں ’سعودی آٹوموبائل اینڈ موٹر سائیکل فیڈریشن (ایس اے ایم ایف) نے القدیہ شہر اور پبلک انویسٹمنٹ فنڈ کی شراکت کے ساتھ منظم کیا گیا۔
پہلی ریس میں سویڈن کے کرسٹوفرسن موٹر سپورٹ ٹیم نے شاندار کارکردگی دکھائی۔ یوہان کرسٹوفرسن اور میکائیلا آلِن-کوٹولنسکی نے پہلی پوزیشن حاصل کی۔
ہینسن موٹر سپورٹ ٹیم، جس کی نمائندگی ناروے کے اولے کرسچیئن ویبی اور ہیڈا ہوساس نے کی، دوسری پوزیشن پر رہی۔
اسی ٹیم کے دوسرے ڈرائیور، ناروے کے آندریاس باکریڈ اور برطانیہ کی کیٹی مننگز نے تیسری پوزیشن حاصل کر کے سرفہرست تین ٹیموں میں جگہ بنائی۔
ریڈیمپشن ریس میں جمیل موٹر سپورٹ ٹیم، جس میں سویڈن کے کیون ہینسن اور آسٹریلیا کی مولی ٹیلر شامل تھے، نے پہلی پوزیشن حاصل کی۔ ان کے بعد فن لینڈ کے ٹومی ہال مین اور سپین کی کرسٹین جی زی کی قیادت میں جے بی ایکس ٹیم دوسری پوزیشن پر رہی، جبکہ برطانیہ کے پیٹرک اوڈونون اور امریکہ کی امانڈا سورنسن کی نمائندگی کرنے والی سٹارڈ ٹیم نے تیسری پوزیشن حاصل کی۔
یہ چیمپئن شپ چھ اکتوبر کو اختتام پذیر ہوئی جو 3127 میٹر لمبے اور 10 سے 60 میٹر چوڑے ٹریک پر ہوئی۔
