نو مئی کے پانچویں کیس میں یاسمین راشد سمیت پی ٹی آئی رہنماؤں کو 10 10 برس قید کی سزا

انسداد دہشت گردی عدالت لاہور نے نو مئی کے واقعات کے سلسلے میں کلب چوک جی او آر گیٹ حملہ کیس کا فیصلہ سناتے ہوئے ڈاکٹر یاسمین راشد، میاں محمود الرشید، اعجاز چوہدری اور عمر سرفراز چیمہ کو 10 10 برس قید کی سزا سنا دی۔ جبکہ شاہ محمود قریشی کو مقدمے سے بری کر دیا گیا۔

جمعے کو انسداد دہشت گردی عدالت کے جج منظر علی گل نے کوٹ لکھپت جیل میں فیصلہ سنایا۔

پاکستان تحریک انصاف کے ان چاروں رہنماؤں کو نو مئی کے واقعات کے حوالے سے پانچویں مقدمے میں سزا سنائی گئی ہے۔

عدالت نے اشتہاری قرار دیے گئے چار ملزمان کو گرفتار کر کے پیش کرنے کا بھی حکم دیا، جن میں فاروق انجم، حبیب احمد، ارسلان اور اکبر خان شامل ہیں۔

عدالتی فیصلے کے مطابق دورانِ ٹرائل ڈاکٹر یاسمین راشد سمیت 21 ملزمان کے حتمی بیانات قلمبند کیے گئے، جبکہ پراسیکیوشن کی جانب سے مجموعی طور پر 56 گواہوں کو عدالت میں پیش کیا گیا۔ مقدمے میں مجموعی طور پر 25 ملزمان نامزد تھے جن کا چالان عدالت کے روبرو پیش کیا گیا تھا۔

تھانہ ریس کورس پولیس کے مطابق مقدمہ کلب چوک جی او آر گیٹ پر حملے کے الزام میں درج کیا گیا تھا۔ ایف آئی آر کے متن کے مطابق ’ملزمان نے جی او آر گیٹ پر نصب سیکیورٹی کیمرے توڑے، پولیس کے وائرلیس سیٹ اور شیشوں کو نقصان پہنچایا، سرکاری املاک کو نقصان پہنچایا اور پولیس اہلکاروں پر حملہ کیا۔‘

پراسیکیوشن کے مطابق ’پی ٹی آئی کے نامزد رہنماؤں پر الزام تھا کہ انہوں نے کارکنان کو نو مئی کے واقعات، بغاوت اور فسادات پر اکسانے میں کردار ادا کیا۔‘

عدالت نے مقدمے کی مکمل سماعت کے بعد فیصلہ محفوظ کیا تھا، جو جمعے کو سنایا گیا۔