یکم جنوری سے گھریلو کارکنوں کی تنخواہ بینک کے ذریعے

وزارتِ افرادی قوت و سماجی بہبود آبادی کا کہنا ہے کہ مملکت میں گھریلو کارکنوں کی تنخواہیں یکم جنوری 2026 سے  بینکنگ سسٹم کے ذریعے ادا کی جائیں گی۔

سعودی ٹی وی الاخباریہ کی رپورٹ کے مطابق وزارت نے گھریلو کارکنوں کی اجرت کو منظم کرنے اور فریقین کے حقوق کے تحفظ کو یقینی بنانے کے لیے تنخواہوں کی ادائیگی کا قانون مرحلہ وار نافذ کرنے کا اعلان کیا تھا۔

پہلے مرحلے کا آغاز یکم جولائی 2024 سے کیا گیا جس میں وہ گھریلو کارکن شامل تھے جو پہلی بار مملکت نئے ویزے پر آئے تھے ان کارکنوں کے اسپانسرز پر یہ پابندی عائد کی گئی تھی کہ وہ اپنے ملازم کی تنخواہ کو بینک اکاؤنٹ کے ذریعے ادا کریں۔

دوسرا مرحلہ یکم جنوری 2025 سے شروع کیا گیا جس میں ایسے اسپانسرز شامل تھے جن کے پاس چار سے زائد گھریلو کارکن تھے ۔ تیسرے مرحلے میں تین یا اس سے زائد کارکنوں کےلیے مقرر کیا گیا جس کا آغاز جولائی 2025 کی ڈیڈ لائن دی گئی تھی۔

تیسرے مرحلے کا آغاز اکتوبر 2025 سے کیا گیا جس کے مطابق دو یا اس سے زائد گھریلو کارکنوں کے اسپانسرز شامل تھے جبکہ چوتھے اور آخری مرحلے کے لیے دی گئی ڈیڈ لائن یکم جنوری 2026 کو نافذ العمل ہو گی جس میں تمام گھریلو کارکنان کی کیٹگریز شامل ہیں۔

واضح رہے وزارت افرادی قوت کی جانب سے کارکن اور اسپانسر کے حقوق کے تحفظ کو یقینی بنانے اور بروقت کارکنوں کی اجرت کی یقین دہانی کےلیے مذکورہ سسٹم نافذ کیاگیا ہے تاکہ اس امر کو یقینی بنایا جاسکے کہ کارکنوں کو بروقت ان کی اجرت ادا کی جاتی ہے۔