غیر قانونی گھریلو ملازمین کے لئے 6 ماہ کی مہلت

وزارت ہیومن ریسورسز نے اعلان کیا ہے کہ غیر قانونی گھریلو ملازمین کے قیام کو قانونی بنانے کے لئے دی جانے والی مہلت میں توسیع کر دی گئی ہے۔

سبق ویب سائٹ کے مطابق نئی مہلت آج سے شروع ہو کر 6 ماہ تک جاری رہے گی۔

اس کا مقصد گھریلو ملازمین اور مالکان کو اضافی وقت فراہم کرنا ہے تاکہ وہ غیر حاضر ملازمین کی حالت کو مساند پلیٹ فارم کے ذریعے خودکار طریقے سے درست کر سکیں جس سے کام کے ماحول میں بہتری اور تمام فریقوں کے حقوق کی ضمانت ممکن ہو سکے۔

وزارت نے وضاحت کی ہے کہ یہ اقدام سعودی عرب میں افرادی قوت کے شعبے کی مسلسل ترقی کی کوششوں کے تحت ہے اور یہ معاہداتی تعلقات میں بہتری کی پہل اور لیبر مارکیٹ کے نظم و نسق کے ضمن میں آتا ہے۔

اس اقدام کے تحت وہ گھریلو ملازمین جن کے بارے میں غیر حاضری کی رپورٹ درج ہو چکی ہے یا جن کے اقاموں کی مدت ختم ہو چکی ہے اور جو ملک میں غیر قانونی طور پر مقیم ہیں، وہ اپنے حالات درست کر کے اپنی خدمات کو نئے مالکان کے ساتھ منتقل کر سکتے ہیں بشرطیکہ تمام قانونی اقدامات مکمل کئے جائیں۔

وزارت نے مزید کہا کہ یہ تمام کارروائیاں مساند پلیٹ فارم کے ذریعے کی جائیں گی اور یہ توسیع صرف ان گھریلو ملازمین پر لاگو ہوتی ہے جو اعلان کے بعد غیر حاضر نہیں ہوئے۔