بنک کے ذریعے گھریلو ملازمین کی تنخواہوں کی ادائیگی کا تیسرا مرحلہ

سعودی وزارت افرادی قوت وسماجی بہبود آبادی نے ’المساندہ ‘ سکیم کے تحت گھریلو ملازمین کی تنخواہوں کی ادائیگی کے طریقہ کے تیسرے مرحلہ کاآغاز کردیا ہے۔

سعودی خبررساں ایجنسی ’ایس پی اے‘ کے مطابق وزارت کی جانب سے مساند پروگرام کے تحت گھریلو ملازمین کے حقوق کے تحفظ کےلیے تنخواہوں کی ادائیگی کو بنک اکاونٹ سے منسلک کرنے کا پروگرام شروع کیا تھا۔

تیسرا مرحلہ جس کا آغاز یکم جولائی 2025 سے کیا گیا ہے میں وہ سپانسرز شامل ہیں جن کی زیر کفالت تین یا اس سے زائد ملازمین ہیں۔

مساند پروگرام کا دوسرا مرحلہ یکم جنوری 2025 کو کیا گیا تھا جس میں چار یا اس سے زائد گھریلو ملازمین کی تنخواہوں کی ادائیگی بینک سسٹم کے ذریعے کی گئی تھی۔

وزارت کے مساند پروگرام کے تحت گھریلو ملازمین کی اجرت ضوابط کو منظم و محفوظ کرنے کے مرحلہ وار عمل کیا جارہا ہے۔

دوسرے مرحلے کے مکمل ہونے کے بعد دو یا اس سے زائد ملازمین کی تنخواہوں کی ادائیگی کو بینک اکاونٹ سے جوڑا جائے گا جس کا آغاز یکم اکتوبر2025 سے ہو گا۔

آخری مرحلہ یکم جنوری 2026 سے شروع ہو گا جس میں تمام گھریلو ملازمین کی تنخواہوں کو بنک اکاونٹ کے ذریعے ادا کرنا لازمی ہوگا۔