’سدایا‘ کے صدر نے جدہ ایئرپورٹ کا دورہ کیا، ای گیٹ آپریشنز کا جائزہ

سعودی ڈیٹا اینڈ آرٹیفیشل انٹیلی جنس اتھارٹی (سدایا) کے صدر ڈاکٹر عبداللہ شرف الغامدی نے جدہ کے کنگ عبدالعزیزانٹرنیشنل ایئرپورٹ پر نصب ڈیجیٹل سسٹمز اور ای گیٹ آپریشنز کا معائنہ کیا۔

سعودی خبررساں ایجنسی (ایس پی اے) کے مطابق اس موقع پر سدایا میں نیشنل انفارمیش سینٹر کے ڈائریکٹر ڈاکٹر عصام الوقیت و دیگر اعلی عہدیدار بھی موجود تھے۔

سدایا کے صدر کو ایئرپورٹ پر امیگریشن کے لیے نصب ای گیٹ سسٹم کی تفصیلات سے آگاہ کیا گیا جس کا مقصد عمرہ زائرین کو امیگریشن کی جدید ترین سہولتیں فراہم کرنا ہے۔

سدایا کی جانب سے مملکت کے ایئرپورٹس اور دیگر سرحدی چوکیوں پر امیگریشن کی جدید سہولتوں کی فراہمی کو یقینی بنایا جارہا ہے تاکہ عمرہ زائرین اور عازمین کو بہترین خدمات فراہم کی جا سکیں۔

واضح رہے سدایا کی جانب سے جدہ کے کنگ عبدالعزیز انٹرنیشنل ایئرپورٹ پر70 ای گیٹس اور 6 انٹرنیشنل ٹرمنلز پر 636 سٹیشن کی سہولت فراہم کی گئی ہے جن کے ذریعے عمرہ زائرین کو امیگریشن کی فوری خدمات فراہم کی جاتی ہیں۔

سدایا کے وفد کے ہمراہ جدہ ایئرپورٹس کمپنی کے بورڈ آف ڈائریکٹرز کے چیئرمین انجینئر رائد المدیھیم، سی ای او انجینئرمازن جوھر، ڈائریکٹر جوازات ایئرپورٹ کرنل ماھرالمسعود بھی موجود تھے۔