امید ہے امریکہ اور ایران کے درمیان جلد از جلد مذاکرات ہوں گے: اسحاق ڈار

پاکستان کے نائب وزیراعظم اور وزیر خارجہ اسحاق ڈار نے کہا کہ پاکستان پرامید ہے کہ امریکہ اور ایران کے درمیان جلد از جلد مذاکرات ہوں گے۔

اسلام آباد میں اتوار کی رات سعودی عرب، پاکستان، مصر اور ترکیہ کے وزرائے خارجہ کے مشاورتی اجلاس کے حوالے سے گفتگو کرتے ہوئے ان کا کہنا تھا کہ چاروں ممالک کی کوشش ہے کہ خطے میں جلد از جلد جنگ بندی ہو۔

اسحاق ڈار نے کہا کہ ’اس بات کی خوشی ہے کہ امریکہ اور ایران دونوں نے پاکستان پر اعتماد کا اظہار کیا۔‘

انہوں نے کہا کہ مشاورتی اجلاس میں وزرائے خارجہ نے علاقائی صورتحال پر تفصیلی تبادلہ خیال کیا۔

ڈار کے مطابق وزرائے خارجہ نے کہا کہ ڈائیلاگ اور ڈپلومیسی ہی مسئلے کا حل ہے۔ ’وزرائے خارجہ نے اتفاق کیا کہ جنگ مسئلے کا حل نہیں۔‘

ڈار نے کہا کہ موجودہ صورتحال کے حوالے سے ان کی چین کے وزیر خارجہ سے بھی ٹیلیفون پر بات ہوئی۔

مشاورتی اجلاس میں وزرائے خارجہ نے جنگ کی فوری بندش پر زور دیا۔

نائب وزیراعظم نے کہا کہ وزرائے خارجہ نے چاروں ممالک کے درمیان قریبی تعاون پر زور دیا۔