گُوگل کا نیا موبائل فون کیسا ہو گا؟ پکسل 11 کا ڈیزائن لِیک

گوگل کے آنے والےسمارٹ فون پکسل 11 کے حوالے سے پہلی بڑی لیک سامنے آ گئی ہے، جس سے ظاہر ہوتا ہے کہ اس بار ڈیزائن میں نمایاں تبدیلیاں دیکھنے کو نہیں ملیں گی۔

ٹیک ویب سائٹ سی نیٹ کے مطابق اینڈرائیڈ ہیڈ لائنز نے ان لیکس کے فراہم کردہ سی اے ڈی رینڈرز شیئر کیے ہیں، جن میں پکسل 11 کا معیاری ماڈل دکھایا گیا ہے۔

رپورٹس کے مطابق نئے پکسل 11 میں پچھلے ماڈل کی طرح تین کیمروں پر مشتمل سیٹ اپ برقرار رکھا گیا ہے، جس میں ٹیلی فوٹو لینز بھی شامل ہے۔

سامنے آنے والی تصاویر کے مطابق سمارٹ فون کے بیزلز قدرے پتلے کیے گئے ہیں جبکہ سکرین کا سائز ممکنہ طور پر 6.3 انچ ہی برقرار رہے گا۔ 

سب سے نمایاں تبدیلی کیمرہ بار میں دیکھی گئی ہے جو اب مکمل طور پر ڈیزائن میں ہوگا جبکہ باقی فون کا ڈیزائن مجموعی طور پر پہلے جیسا ہی رکھا گیا ہے۔

واضح رہے کہ گوگل نے پکسل سیریز میں پکسل 6 کے ساتھ ڈیزائن میں بڑی تبدیلی متعارف کروائی تھی اور اس ک بعد سے کمپنی اسی ڈیزائن کو مزید بہتر بناتی ہوئی نظر آ رہی ہے۔

ماہرین کا کہنا ہے کہ گوگل اس وقت اپنے سمارٹ فونز میں مصنوعی ذہانت، خاص طور پر جیمنی کو بہت اہمیت دے رہا ہے، جس کی وجہ سے ڈیزائن میں بڑی تبدیلیاں فی الحال ترجیح نہیں ہیں۔

اس فون کے بارے میں مزید تفصیلات کے حوالے سے خیال ظاہر کیا جا رہا ہے کہ وہ مئی میں ہونے والی گوگل آئی او کانفرنس کے موقع پر سامنے آ سکتی ہیں۔