راولپنڈی: پاکستان اور ’کمزور‘ آسٹریلوی ٹیم کے درمیان پہلا ون ڈے میچ آج

پاکستان کی ٹیم آج پنڈی کرکٹ سٹیڈیم میں آسٹریلیا کی نسبتاً کمزور ٹیم کے خلاف تین ایک روزہ میچز پر مشتمل سیریز کا پہلا میچ کھیلے گی۔
فرانسیسی خبر رساں ایجنسی اے ایف پی کے مطابق دونوں ٹیمیں آئندہ سال ہونے والے ورلڈ کپ کے لیے مضبوط کمبی نیشن تیار کرنے کوشش کریں گی۔
آسٹریلوی ٹیم اپنے مستقل کپتان پیٹ کمنز اور ان کے اہم ساتھی فاسٹ بولرز مِچل سٹارک اور جوش ہیزل وُڈ کے بغیر میدان میں اُترے گی۔ 
کپتان پیٹ کمنز، مچل سٹارک، جوش ہیزل وڈ اور اوپنر ٹریوس ہیڈ کو انڈین پریمیئر لیگ (آئی پی ایل) میں مصروفیات کے باعث آرام کا موقع دیا گیا ہے۔
دورۂ پاکستان کے لیے ابتدائی طور پر مچل مارش کو آسٹریلوی ٹیم کپتان مقرر کیا گیا تھا، تاہم وہ بھی ٹخنے کی انجری کے باعث سیریز سے باہر ہو گئے۔
اس کے بعد جوش انگلس کو آسٹریلوی ٹیم کی قیادت سونپی گئی ہے۔ اس سیریز کا دوسرا میچ دو جبکہ تیسرا اور آخری میچ چار جون کو لاہور کے قذافی سٹیڈیم میں کھیلا جائے گا۔