سعودی عرب میں اقامہ، لیبر اور بارڈر قوانین کی 15 ہزار 591 خلاف ورزیاں

سعودی حکام نے ایک ہفتے کے دوران اقامہ، لیبر اور بارڈر سکیورٹی کی مزید 15 ہزار 591 خلاف ورزیاں ریکارڈ کی ہیں جبکہ 12 ہزار 292 غیر قانونی تارکین کو ان کے ملک واپس بھیجا گیا۔

ایس پی اے کے مطابق ’25 جون سے یکم جولائی 2026 کے درمیان مجموعی طور پر 7 ہزار 759 افراد کو اقامہ قانون، 4 ہزار 488 کو غیر قانونی سرحد عبور کرنے کی کوشش اور 3 ہزار 344 کو قانون محنت کی خلاف ورزی پر حراست میں لیا گیا۔‘

’غیر قانونی طور پر مملکت میں داخل ہونے کی کوشش پر ایک ہزار 629 افراد کو حراست میں لیا گیا، ان میں 53 فیصد ایتھوپین، 46 فیصد یمنی اور ایک فیصد دیگر ملکوں سے تعلق رکھتے ہیں۔

علاوہ ازیں مزید 58 ایسے افراد کو بھی پکڑا گیا ہے، جو سرحد پار کر کے مملکت سے ہمسایہ ملکوں میں داخل ہونے کی کوشش کر رہے تھے۔

 سفر، رہائش، روزگار اور پناہ دینے کی کوششوں میں ملوث 17 افراد کو بھی حراست میں لیا گیا ہے۔

واضح رہے سعودی عرب میں غیرقانونی تارکین وطن کو سفری، رہائشی یا ملازمت کی سہولت فراہم کرنا قانوناً جرم ہے اور اس کے لیے مختلف سخت سزائیں مقرر ہیں۔

 سعودی وزارت داخلہ کا کہنا ہے’ جو بھی شخص غیر قانونی تارکین کو سعودی عرب میں داخل ہونے کی سہولت فراہم کرے گا، اسے 15 برس قید اور 10 لاکھ  ریال تک جرمانے کے ساتھ گاڑی اور جائداد کی ضبطی کی سزا کا سامنا کرنا پڑ سکتا ہے۔‘

مکہ اور ریاض میں ٹول فری نمبر 911 جبکہ مملکت کے دیگر علاقوں میں 999 یا 996 پر مشتبہ خلاف ورزیوں کی اطلاع دی جا سکتی  ہے۔