سیمی فائنل میں شکست کے بعد جوڈ بیلنگھم نے ارجنٹائنی کھلاڑی ویلنٹین بارکو کو تھپڑ مارا

ارجنٹائن کے خلاف ورلڈ کپ سیمی فائنل  جوڈ بیلنگھم کے لیے اچھا ثابت نہیں ہوا۔ نہ صرف ارجنٹائن نے آخری لمحات میں شاندار کم بیک کرتے ہوئے فائنل میں جگہ بنائی بلکہ انگلینڈ کے سٹار مڈفیلڈر میچ کے اختتام پر اپنے جذبات پر قابو نہ رکھ سکے اور جھگڑے میں الجھ گئے۔

نیشنل نیوز کے مطابق ریئل میڈرڈ سے تعلق رکھنے والے جوڈ بیلنگھم، جو پورے ٹورنامنٹ میں انگلینڈ کے نمایاں کھلاڑیوں میں شمار کیے جا رہے تھے، اس وقت شدید مایوسی کا شکار ہو گئے جب لیونل میسی کے شاندار اسسٹ سے ارجنٹینا نے 2-1 سے سنسنی خیز فتح حاصل کی۔ میسی نے ارجنٹائن کے دونوں گولز میں فیصلہ کن کردار ادا کیا۔

بیلنگھم میچ کے آغاز ہی سے جارحانہ انداز میں نظر آئے۔ پہلے ہاف میں اس وقت کشیدگی پیدا ہوئی جب اینزو فرنانڈیز نے ایلیٹ اینڈرسن کے سر کے پچھلے حصے پر بازو مارا، تاہم ریفری اسماعیل الفتح نے کوئی فاؤل نہیں دیا۔ اس واقعے کے بعد ریفری کو بیلنگھم اور لیونل میسی کے درمیان مداخلت کرنی پڑی۔

پہلے ہاف کے دوران دونوں ٹیموں کے کھلاڑیوں کے درمیان کئی بار تلخ جملوں اور دھکم پیل کا تبادلہ بھی دیکھنے میں آیا۔ میچ ختم ہونے کے بعد صورتحال مزید کشیدہ ہو گئی۔ ارجنٹائن کے کھلاڑی فتح کا جشن منانے کے لیے ایک جگہ جمع ہوئے تو بیلنگھم ان کی جانب بڑھے اور بینچ پر موجود ارجنٹائن کے ڈیفینڈر ویلنٹین بارکو کے سر پر تھپڑ مار دیا۔

اس کے فوراً بعد ارجنٹائن کے متعدد کھلاڑی بیلنگھم کے گرد جمع ہو گئے جبکہ تجربہ کار ڈیفینڈر نکولس اوٹامینڈی نے بھی ان کا سامنا کیا۔

فیفا نے تاحال اس واقعے پر کوئی باضابطہ ردِعمل نہیں دیا، تاہم بیلنگھم کے اس رویے پر ان کے خلاف تادیبی کارروائی کیے جانے کا امکان ظاہر کیا جا رہا ہے۔

میچ کے حوالے سے انگلینڈ کے لیے مایوسی صرف اس جھگڑے تک محدود نہیں رہی۔ تھری لائنز نے ابتدا میں بہترین کھیل پیش کرتے ہوئے انتھونی گورڈن کے گول کی بدولت برتری حاصل کی، لیکن اس کے بعد ٹیم دفاعی حکمتِ عملی اختیار کر گئی اور ارجنٹائن کو مسلسل دباؤ بڑھانے کا موقع مل گیا۔

آخرکار اینزو فرنانڈیز اور لاوتارو مارٹینیز نے آخری لمحات میں گول کر کے ارجنٹائن کو 2-1 کی یادگار فتح اور ورلڈ کپ فائنل کا ٹکٹ دلوا دیا۔

میچ کے بعد انگلینڈ کے ہیڈ کوچ تھامس ٹوخل سے ان کی دفاعی حکمتِ عملی پر سوال کیا گیا تو انہوں نے اپنے فیصلے کا دفاع کرتے ہوئے کہا ’اس پر لاکھوں کوچز مختلف رائے دے سکتے ہیں، لیکن میدان میں فیصلہ مجھے کرنا ہوتا ہے۔ میں نے میچ کا جائزہ لیا اور اسی بنیاد پر یہ حکمتِ عملی اختیار کی، اس لیے اس کی ذمہ داری بھی میری ہے۔ اس لمحے مجھے اپنے فیصلے پر کوئی افسوس نہیں۔ ٹیم نے اپنی بھرپور کوشش کی اور ہم کامیابی کے بہت قریب تھے۔‘