اسلام آباد... سپریم کورٹ کے چیف جسٹس ثاقب نثار نے پاکستانیوں کے بیرون ملک اکاونٹس سے پیسہ واپس لانے کیلئے کمیٹی بنادی۔از خود نوٹس کی سماعت کے دوران چیف جسٹس نے کہا کہ بڑی تعداد میں پاکستانیوں نے بیرون ملک اکاونٹس اور املاک بنا رکھی ہیں۔گورنر اسٹیٹ بینک بتائیں کہ سوئٹزرلینڈ میں موجود اکاونٹس سے پیسہ کیسے واپس آسکتا ہے؟چیف جسٹس نے کہا کہ اتنا سارا پیسہ بیرون ملک چلا گیا، ممکن نہیں کہ ساری رقم کالے دھن کی ہو۔اکثریت ایسے لوگوں کی ہے جو غیر قانونی طریقے سے رقم لے کر گئے۔ کچھ ایسے بھی ہوں گے جو قانونی طریقے سے رقم لے گئے ہوں۔کہاجاتا ہے یہ پیسہ واپس آجائے تو ہمارے سارے قرضے اتر جائیں۔گورنر اسٹیٹ بینک نے بتایا کہ بیرون ملک اکاونٹس کے حوالے سے معاہدے ہو رہے ہیں۔ سوئٹزرلینڈ سے بھی دو طرفہ معاہدہ ہو گیا۔ پیسہ واپس لانے کے لئے بھرپور کوشش کریں گے۔چیف جسٹس نے گورنر اسٹیٹ بینک طارق باجوہ کی سربراہی میں چیئرمین ایف بی آر اور سیکرٹری خزانہ پر مشتمل 3 رکنی کمیٹی تشکیل دیتے ہوئے حکم دیا کہ مل کر طریقہ کار بنائیں۔کمیٹی ایک ہفتے میں گائیڈ لائن دے کہ بیرون ملک سے رقم کیسے واپس لانی ہے۔کمیٹی حکومت کے کسی بھی ادارے سے معلومات لینے کی مجاز ہوگی۔ مقصد یہ ہے کہ غیرقانونی طریقے سے بھیجی رقم واپس لائی جائے۔ پیسہ واپس لانے والوں کو رعایت دینے کے معاملے پر غور کریں گے۔
