پاکستان کے وزیراعظم شہباز شریف نے کہا ہے اسلام آباد مفاہمتی یادداشت کے فریم ورک کے تحت سوئٹزرلینڈ میں ہونے والا اعلیٰ سطح کی کمیٹی کا پہلا اجلاس کامیابی کے ساتھ اختتام پذیر ہو گیا ہے۔
پیر انہوں نے ایکس پر ایک پوسٹ میں لکھا کہ ’بات چیت مثبت اور تعمیری ماحول میں ہوئی اور اس میں حوصلہ افزا نتائج اور اہم پیش رفت سامنے آئی جن میں 60 روز کے اندر حتمی معاہدے کے لیے روڈ میپ، سیاسی نگرانی کے لیے اعلیٰ سطح کمیٹی کا قیام اور مزید تکنیکی بات چیت کا آغاز شامل ہے۔‘
شہباز شریف کا یہ بھی کہنا تھا کہ ’میں امریکہ اور ایران دونوں کی قیادت کی جانب سے تعمیری بات چیت کے عزم کو سراہتا ہوں اور اس تاریخی عمل کو آگے بڑھانے میں تمام برادر اور دوست ممالک کی گرانقدر حمایت پر ان کا شکریہ ادا کرتا ہوں۔‘
انہوں نے بات جاری رکھتے ہوئے کہا کہ وہ خصوصی طور پر قطر کا شکریہ ادا کرنا چاہیں گے جس نے مذاکرات کو آگے بڑھانے میں اہم تعاون کیا۔
انہوں نے مذاکرات کی میزبانی میں تعاون فراہم کرنے پر سوئس حکومت کا بھی شکریہ ادا کیا اور فیلڈ مارشل عاصم منیر کو بھی خصوصی طور پر خراج تحسین پیش کیا۔
’ان کی انتھک کوششوں سے یہ مذاکرات کامیاب ہوئے۔ ان کی لگن، عزم اور استقامت واقعی لائق ستائش ہے اور ان کے بغیر آگے نہیں بڑھا جا سکتا تھا۔‘
وزیراعظم شہباز شریف نے نائب وزیراعظم اسحاق ڈار کا تذکرہ بھی کیا اور اپنی ٹیم کے ہمراہ بھرپور سفارتی کوششوں پر ان کو سراہا اور شکریہ بھی ادا کیا۔
شہباز شریف نے وزیر داخلہ محسن نقوی کے حوالے سے کہا کہ وہ ان کی محنت اور لگن کو دل کی گہرائیوں سے سراہتے ہیں جنہوں نے مذاکرات کی کامیابی میں بھرپور تعاون کیا۔
’پاکستان مذاکرات اور سفارت کاری کو پُرامن اور دیرپا حل کی طرف بڑھانے میں اپنا مخلصانہ کردار ادا کرتا رہے گا۔‘
