دہشت گرد اب بھاگ رہے ہیں،اعزاز چوہدری

  واشنگٹن ...امریکہ میں پاکستانی سفیراعزاز احمدچوہدری نے کہاہے کہ پاکستان اورامریکہ کو خطے خصو صا افغانستان میں امن واستحکام کے مشترکہ مقصد کے حصول کیلئے ملکرکام کرنے کی ضرورت ہے۔ ورلڈافیئرکونسل اور امریکی یونیورسٹی میں مباحثے سے خطاب کرتے ہوئے انہوں نے کہاکہ سلامتی اور معیشت دونوں شعبوں میں پاکستان کی کامیابیوں کا اعتراف اورانہیں سراہاجاناچاہیے۔ پاکستان کے عوام توقع رکھتے ہیں کہ دونوں ملکوں کے درمیان تعلقات باہمی احترام پرمبنی ہونے چاہئیں۔انہوں نے کہاکہ پاکستان نے اپنی سرزمین سے دہشت گردی کے خاتمے میں ٹھوس پیشرفت کی ہے۔ دہشت گرد اب راہ فراراختیارکررہے ہیں۔خفیہ معلومات پرمبنی آپریشن ردالفساد کے ذریعے باقی ماندہ دہشت گرد عناصر کاپیچھا کیاجارہاہے۔ انہوں نے افغانستان کی صورتحال پر تشویش ظاہر کی اور کہاکہ افغانستان میں عدم استحکام سے پورے خطے کے امن واستحکام کونقصان ہوسکتاہے۔ انہوں نے واضح کیاکہ موثرسرحدی نظم ونسق دہشت گردوں کی سرحد پار سے نقل وحرکت روکنے میں اہم کردار ادا کرسکتاہے۔انہوں نے کہا کہ افغان پناہ گزینوں کی جلدواپسی کی ضرورت ہے ۔طالبان او ر دوسرے عسکریت پسندوں کی پناہ گزینوں کے روپ میں تعدادبڑھ رہی ہے۔ انہوں نے دہشت گردی کیخلاف جنگ میں پاکستان کی قربانیوں اورکامیابیوں کو بھی اجاگرکیا۔

مزید پڑھیں:دہشت گردوں کے ٹھکانے افغانستان میں ہیں،جنرل باجوہ