پرامن ومستحکم افغانستان چاہتے ہیں،تہمینہ جنجوعہ

اسلام آباد... سیکرٹری خارجہ تہمینہ جنجوعہ نے کہا ہے کہ پاکستان امریکہ کے ساتھ باہمی احترام اور مشترکہ مفادات پر مبنی وسیع البنیاد تعلقات کا خواہاں اور پر امن و مستحکم افغانستان دیکھناچاہتا ہے۔ اقوام متحدہ کی جنرل اسمبلی اجلاس کے موقع پر جنوبی و وسطی ایشیا کیلئے امریکہ کی پرنسپل معاون وزیر خارجہ ایلس ویلز سے بات چیت کرتے ہوئے سیکرٹری خارجہ نے کہا کہ پاکستان پر امن اور مستحکم افغانستان دیکھنا چاہتا ہے۔انہوں نے افغانستان میں حکومتی کنٹرول سے باہر علاقوں کے بارے میں پاکستان کی تشویش سے بھی آگاہ کیا جو دہشت گرد گروپ خطے میں دہشت گرد حملوں کیلئے استعمال کرتے ہیں۔سیکرٹری خارجہ نے پاک افغان سرحد کو محفوظ بنانے کی غرض سے پاکستان کے اقدامات اور کشمیر میں ہندوستانی فورسز کی جانب سے بڑھتی ہوئی انسانی حقوق کی خلاف ورزیوں سے بھی آگاہ کیا۔معاون وزیر خارجہ ا یلز ویلس نے کہا کہ امریکہ پاکستان کی نئی حکومت کیساتھ کام کا خواہاں ہے۔ افغانستان میں امن کیلئے پاکستان کی حمایت ضروری ہے۔