سابق وزیر عاصمہ ارباب کیخلاف نیب ریفرنس
اسلام آباد.. نیب نے سابق وفاقی وزیر عاصمہ ارباب کے خلاف کرپشن کا ریفرنس دائر کرنے جبکہ اکرم درانی اور روبینہ خالد کےخلاف تحقیقات کی منظوری دے دی۔منگل کو نیب سے جاری اعلا میے کے مطابق چیئرمین نیب جسٹس (ر) جاوید اقبال کی زیرصدارت نیب ایگزیکٹو بورڈ کے اجلاس سابق وفاقی وزیر عاصمہ ارباب عالمگیراور سابق وائس چانسلر عبدالولی خان یونیورسٹی مردان ڈاکٹر احسان کے خلاف ریفرنس دائر کرنے کی منظوری دی گئی۔ سابق وفاقی وزیر اکرم درانی، سینیٹر روبینہ خالد، وی سی بے نظیر بھٹو یونیورسٹی لیاری ڈاکٹر اختر بلوچ اور مسیرز کوسموس پروڈکشن کی انتظامیہ کے خلاف بھی تحقیقات کی منظوری دی گئی۔ شیخ زید میڈیکل کمپلیکس لاہور کے سابق پروفیسر ڈاکٹر اجمل حسن نقوی کے خلاف انکوائری بند کرنے کی منظوری دی گئی۔چیئرمین نیب نے کہا کہ نیب بدعنوانی کے خاتمے کےلئے احتساب سب کےلئے کی پالیسی پر عمل پیرا ہے، میگا کرپشن کیسز کو منطقی انجام تک پہنچایا جائے۔
