خواجہ برادران کی گرفتاری ،نیب کی چارج شیٹ

لاہور... نیب لاہور نے خواجہ برادران کی گرفتاری کی وجوہ جاری کرتے ہوئے بتایا کہ خواجہ سعد رفیق نے اپنی اہلیہ، بھائی سلمان رفیق، ندیم ضیا اور قیصر امین بٹ سے ملکر ائیر ایونیو سوسائٹی بنائی۔بعد میں ائیر ایونیو کا نام تبدیل کرکے پیراگون رکھ دیا گیا۔ نیب ترجمان کے مطابق ریکارڈ سے ظاہر ہوتا ہے کہ میسرز پیرا گون سٹی مبینہ طورر پر غیر قانونی سوسائٹی ہے۔ملزمان نے بڑے پیمانے پر سوسائٹی کے ممبران سے دھوکہ دہی کی ۔ غیر قانونی ہاوسنگ منصوبے کے فنڈز سے ذاتی مفادات حاصل کئے ۔ سعد رفیق نے اپنے اور اپنے بھائی سلمان رفیق کے نام پر40کنال کے پلاٹ حاصل کئے ۔ ملزمان نے اپنے سرکاری عہدے کا غیر قانونی استعمال کرتے ہوئے اس منصوبے کی توسیع اور مارکیٹنگ کی اور متعدد کمرشل پلاٹس بیچ کر فائدہ حاصل کیا جن کی مالیت اربوں روپے بنتی ہے۔ یہ پلاٹ حقیقت میں میسرز پیرا گون سٹی کی ملکیت نہیں تھے ۔ بدعنوانی کی رقم کی وصولی، قانون کے مطابق انکوائری، انویسٹی گیشن کے لئے ثبوت جمع کرنے اور اسے منطقی انجام تک پہنچانے کےلئے ملزمان کی گرفتاری ضروری تھی ۔