شہریار آفریدی کی شہرت کو کون نقصان پہنچا رہا ہے؟

اسلام آباد ...وزیر مملکت برائے داخلہ شہر یار  آفریدی نے میڈیا پر خود سے منسوب خبروں کی تردید کرتے ہوئے کہا ہے کہ میرا اور عمران خان کا وژن ملک کو ڈرگ فری بنانا ہے ۔دوران مہم اگر کوئی میرے ساتھ تصویر بنا کر استعمال کر رہا ہے تو اس سے میرا کوئی تعلق نہیں ۔ایک بیان میں وزیرمملکت نے کہاکہ اسلام آباد سمیت ملک بھر میں منشیات کے خلاف مہم میں نے شروع کی ۔ منشیات کے خلاف مہم میں وزیر اعظم عمران خان کی پشت پناہی حاصل ہے ۔ چند مجرمانہ ذہنیت کے لوگ میرے ساتھ تصاویر بنا کر سوشل میڈیا پر ڈال رہے ہیں۔ وزیر مملکت نے کہاکہ عام سیاسی ورکر ہوں، کسی کو اپنے ساتھ تصویر لینے سے منع نہیں کرسکتا ۔ دوران مہم اگر کوئی میرے ساتھ تصویر بنا کر استعمال کر رہا ہے تو اس سے میرا کوئی تعلق نہیں ۔ان لوگوں کے خلاف ہاتھ ڈالا ہے اس لئے یہ میری شہرت کو نقصان پہنچا رہے ہیں۔ منشیات کی روک تھام کیلئے سڑکوں اور بسوں پر آگاہی مہم چلا رہا ہوں ۔