حکومت نے غریب کا کباڑہ کردیا، ممنون حسین

لاہور.... سابق صدر مملکت ممنو ن حسین نے کہا کہ پورا ملک نواز شریف سے اپنی محبت اورعقیدت کا اظہار کررہا ہے۔ان کی صحت اتنی اچھی نہیں۔انہیں علاج معالجے کی مکمل سہو لتیں ملنی چاہئیں۔ کوٹ لکھپت جیل میں سابق وزیر اعظم نواز شریف سے ملاقات کے بعد میڈیا سے گفتگو کرتے ہوئے انہوںنے کہا کہ بطور صدر مملکت دن رات کام کرتا تھا۔تعلیم اور صحت کے شعبے میں بہت کام کیا ۔ریاست کی ترقی کے لئے کام کیا کرتا تھا لیکن کبھی اپنی تصویر بنوائی اور نہ کبھی اپنی تشہیر کی۔موجودہ صدر اپنی تشہیر کرتے ہیں یا نہیں اس کے بارے میں میڈیا والوں کو معلوم ہوگا۔ انہوںنے کہا کہ حکمران ملک کو ٹھیک نہیں چلا رہے۔آج جتنی مہنگائی ہوئی ہے اس سے پہلے کبھی اتنی مہنگائی نہیں ہوئی۔ انہیں چاہیے کہ سب سے پہلے معیشت کو ٹھیک کریں۔ حکومت نے غریب کا کباڑہ کر دیا اور وہ پریشان ہے ۔غریب کےلئے کام کریں اور اسے پریشانی سے باہر نکالیں۔حکومتی پالیسیوںسے لاکھوں لوگوں بےروز گار ہو گئے۔ ملک کے حالات دگر گوں ہیں ۔اللہ تعالیٰ پاکستان کے حال پر رحم کرے ۔انہوں نے کہا کہ ہماری تو دعا ہے کہ نواز شریف آج ہی جیل سے باہر آ جائیں لیکن اللہ تعالیٰ کی طرف سے نواز شریف کو انصاف ملے گا اور وہ جلد جیل سے باہر آئیں گے۔