نیب کی قابلیت دیکھیں: ’آٹھ سال قبل مرنے والے کو نوٹس‘

قومی احتساب بیورو (نیب) نے سابق وفاقی وزیر اور پیپلز پارٹی کے رہنما سید خورشید احمد شاہ کے متوفی بھائی کے نام بھجوائے جانے والے طلبی کے نوٹس کو غلطی قرار دیتے ہوئے واپس لے لیا ہے۔

پیر کے روز نیب کی جانب سے جاری ہونے والی پریس ریلیز میں کہا گیا ہے کہ ’پیپلز پارٹی کے رہنما اور سکھر سے منتخب رکن قومی اسمبلی خورشید شاہ کے خلاف آمدن سے زائد اثاثے بنانے کی تحقیقات ہو رہی ہیں، جس میں ان کے خاندان کے بعض افراد بھی شامل ہیں۔‘

بیان میں مزید کہا گیا ہے کہ ’تحقیقات کے دوران یہ بات سامنے آئی ہے کہ خورشید شاہ کے بھائی شاہ سپننگ ملز کے شراکت دار ہیں، جو ایس ای سی پی کے پاس رجسٹرڈ ہے۔ اسی وجہ سے مل میں شراکت رکھنے والے تمام افراد کو طلبی کے نوٹسز جاری کیے گئے تاکہ ان کے بیانات ریکارڈ کیے جا سکیں۔ ان میں سید علی نواز شاہ بھی شامل تھے۔‘

نیب نے کہا ہے کہ ان کے علم میں یہ نہیں تھا کہ علی نواز شاہ انتقال کر چکے ہیں۔ اس لیے ان کے نام پر جاری ہونے والا نوٹس چیئرمین نیب جاوید اقبال کے حکم پر واپس لے لیا گیا ہے۔

بیان کے مطابق چیئرمین نیب جاوید اقبال کی جانب سے غلطی کی تحقیقات اور ذمہ دار کا تعین کرنے کے احکامات بھی جاری کیے گئے ہیں۔

خیال رہے کہ آج یعنی پیر کو ہی سید علی نواز شاہ کو جاری ہونے والے نوٹس پر سوشل میڈیا پر شدید ردِعمل دیکھنے میں آیا اور صارفین اس نوٹس کو شیئر کرتے رہے جس میں خورشید شاہ کے مرحوم بھائی کو طلب کیا گیا تھا۔

اسی طرح پیپلز پارٹی کے چیئرمین بلاول بھٹو زرداری نے لاہور میں صحافیوں سے گفتگو کرتے ہوئے اس نوٹس کا بھی ذکر کیا اور حکومت کو تنقید کا نشانہ بنایا۔

بلاول بھٹو زرداری کی گفتگو کے ایک گھنٹے بعد نیب نے نوٹس واپس لینے کی پریس ریلیز جاری کر دی۔

اس وقت بھی سوشل میڈیا پر نوٹس کو شیئر کیا جا رہا ہے اور صارفین کی جانب سے مختلف تبصرے کیے جا رہے ہیں۔

پیپلز پارٹی کے رہنما فرحت اللہ بابر نے اس حوالے سے ٹویٹ کرتے ہوئے لکھا کہ ’نیب کی جانب سے خورشید شاہ کے اس بھائی کو طلب کیا گیا ہے جو آٹھ سال قبل فوت ہو چکے ہیں۔ اب کوئی شک رہ گیا ہے کہ نیب سیاسی انتقام اور سیاسی ری انجینئرنگ کا آلہ کار ہے؟ قابل افسوس

عمران علی سانگی نے ٹویٹ کی کہ ’نیب نے خورشید شاہ کے مرحوم بھائی کو ان کے ساتھ پیش ہونے کا نوٹس جاری کیا ہے، نیب سے کوئی سوال پوچھا جا سکتا ہے؟‘

سینیٹر سعید غنی نے ٹوئٹر پر لکھا کہ ’ نیب کی نااہلی کا ایک اور شاندار شاہکار، اگر چیئرمین نیب، مرحوم کا نوٹس واپس نہ لیتے تو مرحوم تو نیب سکھر میں پیش ہونے کے لیے آرہے تھے۔‘

شاہ جہان شیخ نے ٹویٹ کی کہ ’نیب کی قابلیت کا  معیار چیک کریں، خورشید شاہ کے آٹھ سال قبل فوت ہونے والے بھائی کو نوٹس جاری کر دیا۔‘