کرفیو کی پابندی، وزارت داخلہ کا پیغام کیا ہے؟

سعودی وزارت داخلہ نے کرفیو پر عمل درآمد کے بعد سعودی شہریوں اور مقیم غیر ملکیوں کے نام پیغام جاری کیا ہے-

اخبار 24 کے مطابق وزارت داخلہ نے ٹوئٹر پر پیغام میں کہا ہے کہ’ مملکت میں مقیم غیر ملکیوں اور سعودی شہریوں کی صحت و سلامتی اور امن و امان بے حد عزیز ہے‘-

’ہماری آرزو ہے کہ کرفیو کے دوران آپ اپنے گھروں میں رہیں- آپ کی خاطر جو ہدایات جاری کی گئی ہیں ان کی پابندی کریں‘-

وزارت داخلہ کا کہنا تھا کہ آپ کا اپنے گھروں میں رہنا اس بات کا  ثبوت ہوگا کہ آپ ذمہ داری کا احساس رکھتے ہیں-

’یقین جانیں کہ ہمیں آپ کی صحت عزیز ہے اورامن و امان کا تحفظ ہمارا فرض ہے- ہم میں سے ہر شخص اپنی جگہ امن و سلامتی کا ذمہ دار ہے‘-

یاد رہے کہ شاہ سلمان بن عبدالعزیزنے 21 دن کے لیے مملکت بھر میں جزوی کرفیو کا شاہی فرمان جاری کیا ہے-

کرفیو کورونا وائرس سے بچاو کے لیے لگایا گیا ہے- روزانہ شام سات  سے صبح چھ بجے تک کے لیے کرفیو پر عملدرآمد کرایا جائے گا-