سگریٹ نوش کورونا کا جلد شکار ہوسکتے ہیں؟

جدہ میں تمباکو نوشی کی آگہی مہم چلانے والی تنظیم ’کفی‘ کلینکس کے انچارج ڈاکٹر علی باجابر نے دعوی کیا ہے کہ ’سگریٹ نوش دیگر افراد کےمقابلےمیں نئےکورونا وائرس سےزیادہ متاثرہوسکتے ہیں- تمباکو نوشی کی وجہ سےان کی زندگی اس مہلک وائرس کی زد میں زیادہ ہے‘-

سبق ویب سائٹ کے مطابق ڈاکٹر باجابر کا کہنا ہے کہ ’سگریٹ نوشی کرنے والے افراد کے جسم میں متعدی امراض سے مزاحمت کی طاقت کمزور پڑجاتی ہے جو لوگ طویل عرصے سے سگریٹ نوشی کررہے ہوں وہ تنفس اور پھیپھڑے کی سوزش میں دیگر افراد کے مقابلے میں جلد مبتلا ہوجاتے ہیں‘-

ڈاکٹر علی باجابر کے مطابق سگریٹ نوشوں میں دیگر افراد کے مقابلے میں کورونا وائرس کی علامتیں زیادہ تیزی سے جڑ پکڑ لیتی ہیں-

 ’اگر سگریٹ نوش کورونا وائرس کی زد میں آجائیں تو سانس لینے میں مشکل زیادہ ہوجاتی ہے کیونکہ زیادہ سگریٹ نوشی کی وجہ سے ان کے پھیپھڑوں کا نظام پہلے ہی سے متاثر ہوتا ہے‘-

ڈاکٹر باجابر نے مزید کہا کہ ’مہلک وائرس کورونا تنفس کے نظام پر براہ راست حملہ آور ہوتا ہے- بہتر ہوگا کہ سگریٹ نوش اپنی اس بری عادت سے اس وبا کے زمانے میں نجات حاصل کرلیں‘-

’اگر ہمیشہ کے لیے اس بری لت سے نجات نہیں حاصل کرسکتے تو اس دور میں سگریٹ نوشی ترک کردیں‘-

خود کو اپ ڈیٹ رکھیں، واٹس ایپ گروپ جوائن کریں