انڈین خبر رساں ادارے پریس ٹرسٹ آف انڈیا کے مطابق منگلورو کے ایک اپارٹمنٹ کمپلیکس میں رہائش پذیر نواجوان اتوار کو اپنے ایک دوست کو سوٹ کیس میں ڈال کر فلیٹ کے اندر لے جانے کی کوشش میں پکڑا گیا۔
پولیس ذرائع کا حوالہ دے کر پی ٹی آئی نے بتایا کہ اپارٹمنٹ کی ایسوسی ایشن نے کورونا پھیلنے کے خدشے کے پیش نظر باہر سے کسی کے اپارٹمنٹس تک آنے یا لانے پر پابندی لگا رکھی تھی۔
اس پابندی سے پریشان نوجوان طالب علم نے اپنے دوست کو بلانے کے لیے انوکھی ترکیب سوچی اور دوست کو ایک بڑے سوٹ کیس میں ڈال کر اپارٹمنٹ کے اندر لے آیا۔ جب وہ سوٹ کیس کھینچ کر اندر لے جا رہا تھا تو اس کے اندر حرکت اپارٹمنٹ کے رہائشیوں نے نوٹ کی اور انہوں نے سوٹ کیس کھلوا لیا۔
سوٹ کیس کھولا گیا تو اپارٹمنٹس کے رہائشیوں کی حیرت کی انتہا نہ رہی جب انہوں نے ایک نوجوان کو اندر سے برآمد ہوتے ہوئے دیکھا۔
انہوں نے فوراً پولیس کو بلایا جو دونوں نوجوانوں کو قریبی پولیس سٹیشن لے گئی۔ بعدازاں دونوں نوجوانوں کے والدین کو تھانے بلایا گیا۔
پولیس ذرائع کے مطابق ابھی تک اس حوالے سے کوئی مقدمہ درج نہیں ہوا ہے۔
خیال رہے کہ انڈیا میں کورونا وائرس کی وجہ سے جاری لاک ڈاؤن کا تیسرا ہفتہ ہے۔ ملک میں اب تک 10 ہزار کے قریب کورونا کے مریضوں کی تصدیق ہوئی ہے اور 308 مریض اس وبا سے اپنی جان گنوا بیٹھے ہیں۔