ایئربس کے چھ ہزار طیاروں کو فوری مرمت کی ضرورت، ’پائلٹ کنٹرول کھو سکتے ہیں‘

دنیا کے سب سے زیادہ مقبول مسافر طیاروں میں سے ہزاروں کو فوری طور پر دیکھ بھال کی ضرورت ہے تاکہ ایک ایسے مسئلے سے تحفظ فراہم کیا جا سکے جس کی وجہ سے گزشتہ ماہ ہنگامی لینڈنگ کرنا پڑی اور مسافر بھی زخمی ہوئے۔

امریکی خبر رساں ادارے سی این این کی ایک رپورٹ کے مطابق معروف طیارہ ساز کمپنی ایئربس نے دریافت کیا ہے کہ شدید شمسی طوفان جیسے کہ شمسی شعلے(سولر فلیئرز)، پائلٹوں کے لیے ایئربس اے 320 سیریز کے طیاروں کا کنٹرول کھونے کا سبب بن سکتے ہیں۔

ان مسائل کا خدشہ ایئربس کے جن جہازوں کو ہے، ان میں  اے 319، اے 320، اور اے 321 ماڈلز شامل ہیں۔

دنیا میں سب سے زیادہ فروخت ہونے والے ان سنگل-آئزل طیاروں میں سے قریباً چھ ہزار کو اس مسئلے کے حل کے لیے مرمت درکار ہے۔
ایئربس نے ایک بیان میں کہا ہے کہ ’حال ہی میں پیش آنے والے ایک واقعے کے تجزیے سے یہ بات سامنے آئی ہے کہ شدید شمسی تابکاری (سولر ریڈی ایشن) فلائٹ کنٹرول کے کام کے لیے اہم ڈیٹا کو خراب کر سکتی ہے۔‘

واقعہ کیا تھا؟

یہ مسئلہ 30 اکتوبر کو پیش آیا جب جیٹ بلیو کی فلائٹ 1230 (جو کہ ایک اے320 طیارہ تھا) کینکون، میکسیکو سے نیوارک، نیو جرسی جا رہی تھی کہ اچانک اس کی اونچائی میں کمی واقع ہوئی۔

اس کے بعد پائلٹس نے فلوریڈا کے شہر ٹمپا میں ہنگامی لینڈنگ کی جس کے بعد قریباً 15 افراد کو ہسپتال لے جایا گیا۔
ایئربس نے اس واقعے کی چھان بین کی اور جمعے کو ایئر لائنز کو ایک ’الرٹ آپریٹرز ٹرانسمیشن‘ جاری کی جس میں فوری مرمت کی ضرورت پر زور دیا گیا۔

کمپنی کا خیال ہے کہ یہ خاص مسئلہ صرف ایک مرتبہ ہی پیش آیا ہے لیکن اس نے ’حفاظت کو اپنی اولین ترجیح رکھتے ہوئے ہوابازی کے حکام کے ساتھ مل کر سرگرمی سے کام کیا ہے۔‘
ایئربس اے320 سیریز میں ’فلائی-بائی-وائر‘کنٹرولز ہوتے ہیں جس کا مطلب ہے کہ پائلٹ کی جسمانی حرکات کمپیوٹرز سے گزرتی ہیں جو بدلے میں طیارے کی کنٹرول سطحوں کو ایڈجسٹ کرتے ہیں۔

یورپی یونین کی طرف سے جاری کردہ ایک ایئروَرّدِینس ڈائریکٹو کے تحت ایئر لائنز کو یہ مرمتیں طیاروں کے مسافروں کو دوبارہ لے جانے سے قبل مکمل کرنا ہوں گی۔ زیادہ تر طیاروں کی مرمت قریباً دو گھنٹوں میں کی جا سکتی ہے۔
امریکن ایئر لائنز کے پاس اس قسم کے قریباً 340 طیارے ہیں جنہیں اپ ڈیٹ کرنے کی ضرورت ہے۔

ایئر لائن نے کہا ہے کہ وہ ای اے ایس اے اور ایف اے اے سے ہنگامی ایئروَرّدِینس ڈائریکٹوز کی توقع کرتے ہوئے سافٹ ویئر اپ ڈیٹ کی شناخت اور تکمیل شروع کر چکی ہے اور ’ہمیں توقع ہے کہ آج اور کل تک زیادہ تر طیاروں کا کام مکمل ہو جائے گا۔‘
ڈیلٹا ایئر لائنز نے کہا ہے کہ اس کے 50 سے بھی کم A321neo طیارے متاثر ہوں گے اور یہ کام ہفتے کی صبح تک مکمل ہو جانا چاہیے۔

یونائیٹڈ ایئر لائنز کے بیڑے میں چھ طیارے متاثر ہوئے ہیں اور پروازوں میں ’معمولی رکاوٹ‘ آئے گی۔
جیٹ بلیو جو زیادہ تر اے320 اور اے321 طیارے چلاتی ہے، اس نے بھی مرمت کا کام شروع کر دیا ہے۔