اسرائیل میں کورونا کے خلاف جنگ میں پیش پیش عرب ڈاکٹر

فروری سے لے کر اب تک اسرائیلی عرب ڈاکٹر ختام حسین ہر صبح کو سورج طلوع ہونے سے پہلے اٹھ کر اپنے کام کے لیے نکلتی ہیں جو وہ کورونا وائرس کی وبا سے لڑنے میں انجام دے رہی ہیں۔

خبر رساں ادارے اے ایف پی کے مطابق 44 سالہ خطام حسین اسرئیل کی پسماندہ مانے جانے والی عرب کمیونٹی سے کی اہم رکن ہیں، جو صحت کے موجودہ بحران میں نہایت اہم کردار ادا کر رہی ہیں۔

ختام حسین اسرائیل کے شہر حائفہ کے نزدیک قائم رامبم ہسپتال میں کورونا وائرس سے نمٹنے والے یونٹ کی سربراہ ہیں۔ ملک کے شمالی حصے کے سب سے بڑے ہسپتال میں وہ کئی مہینوں سے روزانہ 12 گھنٹوں تک ڈیوٹی انجام دے رہی ہیں۔ 

ان کا کہنا ہے کہ، 'یہ ایک نہایت ہی مشکل کام ہے۔ کوئی دن ایک طرح کا نہیں ہوتا۔ ہماری زندگیاں پلٹ کر رہ گئی ہیں۔‘

واضح رہے کہ اسرائیل میں کورونا وائرس کے 15 ہزار سے زائد کیسز رپورٹ ہو چکے ہیں اور اس وبا سے ہونے والی اموات کی تعداد 202 تک پہنچ گئی ہے۔

تاہم ختام حسین کا کہنا ہے کہ اس عالمی وبا سے لڑتے ہوئے انہوں نے کئی مریضوں کے ساتھ یادگار لمحات گزارے ہیں۔

ایسے ہی ایک واقعے کے بارے میں بات کرتے ہوئے انہوں نے بتایا کہ ’ایک ضعیف جوڑا وائرس کی وجہ سے شدید بیماری کی حالت میں ہسپتال لایا گیا۔ ان میں سے شوہر کی حالت جلدی خرابی کی طرف جانے لگی تو ہسپتال کے عملے نے انہیں اور ان کی اہلیہ کو آخری بار ملنے کی اجازت دی جس کے بعد شوہر کا انتقال ہوگیا۔‘

'انسان ہونے کی حیثیت سے یہ مشکل ہے۔ پورا طبی عملہ دکھی تھا۔'

اسرائیلی عرب کون ہیں؟

اسرائیلی عرب فلسطینیوں سے تعلق رکھتے ہیں جو اس سرزمین میں 1948 کے بعد رکے تھے جب اسرائیل نے اپنی آزادی کا اعلان کیا تھا۔ 

عرب اسرائیل کی آبادی کا 20 فیصد ہیں اور شعبہ طب میں ان کی تعداد بہت زیادہ ہے۔

2018 میں اسرائیلی وزیر اعظم بینجامن نیتن یاہو نے پارلیمان میں ایک متنازعہ قانون پیش کیا تھا جس کے تحت اسرائیل کو یہودیوں کی ریاست قرار دیا گیا تھا۔

اس کے بعد اسرائیلی عرب ااور دیگر اقلیتوں میں غصے کی لہر دوڑ گئی تھی جن کے مطابق یہ اقدام ان سے ان کا ملک میں رہنے کا حق چھیننے کے مترادف تھا۔

کورونا وائرس کی جنگ 

موجودہ بحران نے یہ بحث دوبارہ چھیڑ دی ہے، کیونکہ کورونا وائرس کے خلاف جنگ میں اسرائیلی عربوں کا نمایاں کردار ہے۔ 

اسرائیل کے مشہور آرٹسٹوں نے رامبم ہسپتال کے لیے آن لائن فنڈز اکھٹا کرنے کے اقدامات کیے ہیں اور اس ہسپتال کو عرب اور یہودی افراد میں بقائے باہمی کی علامت کے طور پر سراہا ہے۔

خود ختام حسین کی خدمات کو بہت سراہا گیا ہے۔

اسرائیل کی پارلیمان میں اپوزیشن کی سب سے بڑی جماعت کے رہنما یائیر لپید کا کہنا ہے کہ اسرائیلی وزیر اعظم نے عرب کمیونٹی سے تعلق رکھنے والے ڈاکٹرز کی خدمات کو مسلسل نظرانداز کیا ہے۔