Sorry, you need to enable JavaScript to visit this website.

ووہان سے طلبہ کی واپسی،فلائٹ 18 مئی کو

پاکستانی طلبہ کی واپسی 18 مئی سے ہو گی (فوٹو: اے ایف پی)
پاکستان نے کورونا وائرس کے باعث چین کے شہر ووہان میں پھنسے پاکستانی طلبہ کی واپسی کے لیے مئی کے وسط میں پہلی پرواز چلانے کا اعلان کیا ہے۔
یہ اعلان پاکستان کے وزیراعظم عمران خان کے معاون خصوصی برائے سمندر پار پاکستانیز زلفی بخاری نے ایک ٹویٹ کے ذریعے کیا ہے۔
انہوں نے لکھا ہے کہ ’میں بہت خوش ہوں کہ 18 مئی کو پہلی پرواز ووہان سے ہمارے پاکستانی طلبہ کو واپس لے کر آئے گی۔‘
زلفی بخاری نے پاکستانی طلبہ کی تعریف کرتے ہوئے لکھا کہ ’آپ بہادر فوجیوں کی طرح ڈٹے رہے، وزیراعظم عمران خان اور پاکستان کے لوگوں کو آپ پر فخر ہے۔ وطن واپسی پر خوش آمدید۔‘
ووہان میں وائرس پھیلنے کے بعد پاکستانی حکام نے وبا کے ممکنہ پھیلاؤ کے ڈر سے طلبہ کو وطن واپس لانے سے انکار کر دیا گیا تھا جس پر ان طلبہ کے والدین نے احتجاج بھی کیا تھا تاہم بعدازاں حکومت کے اس فیصلے کو سراہا گیا تھا۔
اس موقعے پر چین کے قونصل جنرل لی بیجیان نے کہا تھا کہ پاکستان کا چین سے اپنے شہریوں کو واپس نہ لانے کا فیصلہ ’بہت ہی مشکل لیکن اچھا‘ تھا۔

پاکستانی سٹوڈنٹس کے والدین ان کی واپسی کے لیے احتجاج کیا تھا (فوٹو: اے ایف پی)

کراچی پریس کلب میں ’میٹ دی پریس‘ پروگرام سے خطاب میں انہوں نے مزید کہا تھا کہ چین سے شہریوں کو واپس لانے یا وہاں رکھنے کا فیصلہ بہت ہی مشکل تھا۔‘
بیجیان کے مطابق 50 ہزار پاکستانی ورکرز اور طالب علم چین میں رہ رہے ہیں اور ان کو نکالنے سے وائرس پھیلنے کا خدشہ تھا۔

شیئر: