Sorry, you need to enable JavaScript to visit this website.

امارات کے وزیر خارجہ نے کورونا کی تجرباتی ویکسین لگوا لی

جولائی سے عرب امارات میں ویکسین کے تجربات کا آغاز ہو گیا تھا۔ فوٹو ٹوئٹر
متحدہ عرب امارات کے وزیر خارجہ شیخ عبداللہ بن زید النہیان نے بھی کورونا وائرس سے بچاؤ کی تجرباتی ویکسین لگوا لی ہے۔
وزیر خارجہ عبداللہ بن زید النہیان نے تجرباتی ویکسین لگواتے ہوئے اپنی تصویر ٹوئٹر اکاؤنٹ پر شیئر کی ہے جس کے ساتھ انہوں نے لکھا کہ معمول کی زندگی کی طرف واپس لوٹنے کا طریقہ کورونا ویکسینیشن ہی ہے۔
عرب نیوز کے مطابق گزشتہ ماہ متحدہ عرب امارات نے صحت کے عملے کے لیے ہنگامی بنیادوں پر کورونا وائرس کی ویکسین کی منظوری دی تھی۔
اماراتی نیشنل ایمرجنسی کرائسز اور ڈیزاسٹر مینجمنٹ اتھارٹی کا کہنا ہے کہ وائرس کی ویکسین سب سے پہلے کورونا کا فرنٹ لائن پر مقابلہ کرنے والے طبی عملے کو مہیا کی جائے گی جن کی زندگیوں کو سب سے زیادہ خطرہ لاحق ہے۔
ویکسین کے کامیاب کلینکل ٹرائلز کے بعد اماراتی وزیر صحت عبدالرحمان الاویس کو بھی ویکسین کا انجیکشن لگ چکا ہے۔ وزیر صحت کا کہنا ہے کہ ویکیسن مقامی قوانین سے مطابقت رکھتی ہے۔
وزیر صحت کے مطابق ویکسین مؤثر ہے اور ٹرائل کے دوران رضاکاروں میں اینٹی باڈیز پیدا کرنے میں کامیاب ہوئی ہے۔
واضح رہے کہ جولائی میں عرب امارات نے کورونا ویکسین کے ٹرائلز کے تیسرے مرحلے کا آغاز کر دیا تھا۔ یہ ٹرائلز ایک چینی نیشنل بائیو ٹیک کمپنی ’سینو فارم‘، ابو ظبی کی حکومت اور مصنوعی ذہانت کی کمپنی ’جی 42 ہیلتھ کیئر‘ کے اشتراک سے کیے گئے تھے۔
چینی نیشنل بائیو ٹیک کمپنی ’سینو فارم‘ نے ویکسین تیار کی ہے جس کے بڑے پیمانے پر کلینکل ٹرائل عرب امارات میں کیے گئے تھے۔
عرب امارات میں جمعے کے روز کورونا وائرس کے ایک ہزار 412 نئے کیسز سامنے آئے ہیں۔ امارات میں اب تک ایک لاکھ 12 ہزار 849 افراد کورونا وائرس سے متاثر ہو چکے ہیں، جبکہ 455 اموات واقع ہوئی ہیں۔ 

 

شیئر: