کپل شرما کو اپنی بیوی سے معافی کیوں مانگنی پڑ گئی؟

انڈیا اور پاکستان میں یکساں مقبول کپل شرما کی سنیچر کو شادی کی دوسری سالگرہ ہے تاہم وہ کام میں مصروف ہونے کے باعث سالگرہ تو نہیں منا سکے لیکن انہوں نے اپنی بیوی گنی چاتراتھ کے نام ایک پیغام بھیجا ہے۔

انڈین اخبار ہندوستان ٹائمز کے مطابق کپل شرما نے ڈریسنگ روم سے انسٹاگرام پر ایک تصویر شیئر کرتے ہوئے لکھا ہے کہ ’سوری بے بی، میں شادی کی سالگرہ پر کام کر رہا ہوں، گفٹ دینا ہے تو کمانا بھی تو پڑے گا۔ سالگرہ مبارک، شام کو ملیں گے۔‘

کپل شرما کے مداحوں اور دوستوں نے اس پوسٹ پر تبصرے کیے ہیں۔

سابق انڈین کرکٹر ہربجھن سنگھ نے لکھا ہے کہ ’شادی کی سالگرہ مبارک بھائی۔ بہت مبارکاں، جیکٹ کا رنگ بہت اچھا ہے۔‘

ایک مداح نے شادی کی سالگرہ کی مبارک دیتے ہوئے لکھا کہ ’ خدا آپ دونوں پر رحمت نازل کرے اور آپ کو بے پناہ خوشیاں ملیں۔‘

کچھ عرصہ قبل ہندوستان ٹائمز کو انٹرویو دیتے ہوئے کپل شرما نے کہا تھا کہ پہلے وہ شادی پر بہت مذاق کرتے تھے، لیکن اب حقیقت ان کے سامنے آئی ہے اور مذاق زیادہ حقیقی اور مصدقہ لگنے لگی ہے۔‘

انہوں نے اپنی بیوی کے بارے میں کہا کہ ان کی مزاح کی حس بہت اچھی ہے ’وہ میری نقاد بھی ہیں اور مداح بھی ہیں۔‘

کپل شرما اور ان کی بیوی گنی ایک دوسرے کو کالج کے زمانے سے جانتے ہیں۔ ان کی شادی دسمبر 2018 میں جالندھر میں ہوئی تھی۔ ان کی ایک بیٹی انائرا ہے جس کی گذشتہ برس پہلی سالگرہ منائی گئی۔