عروس البلاد ’جدہ ‘ جسے حرمین شریفین کا دروزاہ بھی کہا جاتا ہے۔ ساحلی شہراور بندرگاہ کی وجہ سے ہمیشہ سے ہی اہم رہا ہے۔
شہر کی بلدیہ کی جانب سے جاری کی جانے والی تاریخ کے مطابق جدہ کے گرد سال1947 تک فیصل قائم تھی اور اس دور کے رواج کے تحت شہر کے داخلی دروازے نماز عشا کے فوری بعد بند کر دیے جاتے اور صبح سویرے فجر کی اذان کے ساتھ ہی کھولے جاتے تھے۔
جدہ کے گرد فصیل کی تعمیر 1509 عیسوی میں کی گئی تھی۔
شہر جدہ کے گرد قائم کی جانے والی فصیل کے 7 دروزاے تھے جن کے ذریعے جدہ کے باسی بیرونی دنیا سے رابطہ کرتے تھے اور یہاں سے ہی قافلوں کی آمد رفت ہوتی تھی۔
آج بھی ’باب مکہ ‘ کا علامتی دروازہ اسی مقام پر اور اسی طرز پر تعمیر کیا گیا ہے۔
جدہ کا قدیم علاقہ جسے اس وقت تاریخی علاقہ قرار دیا گیا ہے ’بلد ‘کے نام سے جانا جاتا ہے۔
بلد کا علاقہ اگرچہ اپنے عہد میں کافی ترقی یافتہ اور جدید تصور کیا جاتا ہو گا جہاں تعمیر کی گئی عظیم الشان عمارتوں کی یادگاریں آج بھی موجود ہیں۔
یونیسکو نے 2014 میں اسے تاریخی علاقہ قرار دیا تھا۔(فوٹو سوشل میڈیا)
بلد کے علاقے میں معروف مارکیٹیں آج بھی عہد رفتہ کی یاد تازہ کرتی ہیں جن میں ’شارع قابل‘ ’الخاسکیہ‘ ’حارۃ الشام‘ ’حارۃ المظلوم‘ اور سوق البدو کافی مشہور ہیں۔
قدیم علاقہ ہونے کی وجہ سے آج بھی بیرون ملک سےآنے والے سیاح یہاں لازمی طور پر جاتے ہیں۔
بلد کے قدیم علاقے میں پتھروں اور درختوں کے تنوں سے تعمیر کیے گئے مکانات آج بھی موجود ہیں جنہیں بلدیہ کی جانب سے تاریخی ورثہ قرار دیا گیا ہے۔
ویکی پیڈیا کے مطابق علاقے میں سب سے قدیم مکان جو اب تک اسی حالت میں موجود ہے وہ ’دار ال نصیف اور دار آل جمجوم‘ کا ہے۔
دار آل نصیف کو بلدیہ کی جانب سے میوزیم بنایا گیا ہے جہاں اس دور میں استعمال رہنے والی اشیا بھی رکھی گئی ہیں۔
شہرکے اس قدیم حصہ میں سب سے مشہور بازار ’شارع قابل ‘ 80 کی دہائی تک یہ بازار جدہ سے سب سے بارونق اور معروف بازار شمار ہوتا تھا۔ ماہ رمضان کی راتوں میں یہاں کی رونقیں عروج پر ہوتی تھیں۔
ماضی کی روایات کو برقرار رکھتے ہوئے اہل جدہ آج بھی ہر سال ماہ رمضان کی راتوں کو شارع قابل بازار میں وہی پرانے طرز کے سٹالز لگاتے ہیں جہاں رمضان کی مناسبت سے پکوان اور دیگر مٹھائیاں وغیرہ فروخت کی جاتی ہیں۔
بلدیہ کی جانب سے فروغ سیاحت کے لیے قائم کیے گئے خصوصی شعبے کے تحت اس قدیم تاریخی علاقے کی جانب خاص توجہ دی گئی ہے جہاں آنے والے سیاحوں کو علاقے کی سیر کرانے کے لیے ’گالف ‘ گاڑیوں کی سہولت فراہم کی گئی ہے جس میں بیٹھ کر لوگ اس قدیم علاقے کے گلی کوچوں سے ہوتے ہوئے ان عمارتوں تک جاتے ہیں جنہیں تاریخی ورثہ قرار دیا گیا ہے۔
بلد کی مارکیٹ میں سب سے مشہور عمارت ’کوئین بلڈنگ ‘ کے نام سے آج بھی معروف ہے جسے عربی میں ’عمارہ الملکہ ‘ کہا جاتا ہے۔
